Վարչապետ Նիկոլ Փաշինյանն  այսօր՝ նոյեմբերի 24-ին, Սյունիքի համայնքապետերի հետ հանդիպմանը խոսել է նաեւ համայնքապետերի հետ համագործակցելու մասին։ Այս մասին NEWS.am-ի հետ զրույցում ասաց Տաթեւ համայնքի ղեկավար Սամվել  Լալայանը։

«Մենք ընդհանուր խոսել ենք հենց անվտանգության մասին, մեկ էլ երեկ վարչապետը ինչը որ խոսել է՝ այդ մասին։ Քննարկել ենք, առաջարկություններ ենք արել, ընդունվել է, մեր զրույցը նորմալ անցել է։ Նա ասաց՝ ես առաջարկում եմ՝ սենց լինի, նենց լինի, միջանցքի մասին էլ խոսեց, ասաց՝ մոռացեք դրա մասին, ոչ մեկս չենք խոսում այդ մասին, չենք էլ տալու։ Խոսել ենք, թե ոնց ենք աշխատելու, ասել է՝ համագործակցենք իրար հետ անկախ նրանից՝ որ կուսակցությունից ենք։ Ինքն ասաց, որ առանց խոչընդոտի բոլորս աշխատենք հանուն մեր ժողովրդի, հանուն մեր պետության»,- պատմեց նա։

Համայնքապետն ասաց, որ Փաշինյանը խոսել է նաեւ Ադրբեջանին միջանցք տալու մասին հայտարարություններին. «Ասաց՝ ուղղակի ճանապարհները մտածում ենք ոնց անենք, որ հարաբերությունները լինեն առանց պատերազմի ու կոնֆլիկտի։ Փաշինյանն ասաց, որ միջանցք չի լինելու, մենք պետք է փոխհամաձայնության գանք գոնե եթե ճանապարհ տանք, բայց առայժմ դրա մասին էլ խոսակցություն չկա»։