Հավաքական անվտանգության պայմանագրի կազմակերպության (ՀԱՊԿ) անդամ երկրների զինված ուժերի գլխավոր շտաբների պետերը դեկտեմբերի 8-ին ՀԱՊԿ Ռազմական կոմիտեի նիստին կքննարկեն ռազմական անվտանգությանն սպառնացող վտանգները եւ հավաքական ավիացիոն ուժերի զարգացման հեռանկարները։ Այս մասին հայտնում է ՀԱՊԿ մամուլի ծառայությունը։
«Հավաքական անվտանգության պայմանագրի կազմակերպության անդամ երկրների ռազմական համագործակցության զարգացման ռազմական կոմիտեի նիստը տեղի կունենա դեկտեմբերի 8-ին տեսակոնֆերանսի միջոցով։ Նիստին կքննարկվեն Արեւելյան Եվրոպայի, Կովկասի եւ Կենտրոնական Ասիայի հավաքական անվտանգության տարածաշրջաններում ռազմական անվտանգությանը սպառնացող մարտահրավերներն ու սպառնալիքները, ինչպես նաեւ` Հավաքական ավիացիոն ուժերի հետագա զարգացման եւ կոալիցիոն ուժերի օդային պաշտպանության կազմակերպման հարցերը` հավաքական անվտանգության տարածաշրջաններում դրանց տեղակայմամբ եւ կիրառմամբ»,- ասվում է հաղորդագրության մեջ։
Ռազմական կոմիտեի, ՌԴ ԶՈՒ գլխավոր շտաբի պետ Վալերի Գերասիմովի ղեկավարությամբ նիստին կմասնակցեն Հայաստանի, Բելառուսի, Ղազախստանի, Ղրղզստանի, Տաջիկստանի զինված ուժերի գլխավոր շտաբների պետերը, ՀԱՊԿ միացյալ շտաբի պետ, գեներալ-գնդապետ Անատոլի Սիդորովը եւ ՀԱՊԿ գլխավոր քարտուղարի տեղակալ Թախիր Խաիրուլոեւը։
«Ռազմական կոմիտեի անդամները կտեղեկացվեն 2022 թվականին կազմակերպության նախագահության ժամանակ Հայաստանի Հանրապետության կողմից առաջարկված ռազմական ոլորտում ՀԱՊԿ գործունեության առաջնահերթ ուղղությունների, պաշտպանության ապահովման ոլորտում գործող Ղրղզստանի Հանրապետության պետական մարմինների, ՀԱՊԿ-ի խաղաղապահ ներուժը ՄԱԿ-ի խաղաղապահ գործունեության մեջ ներգրավելու առաջընթացի եւ Միխայլովսկի ռազմական հրետանային ակադեմիայի կողմից ՀԱՊԿ անդամ պետությունների համար հրթիռային ուժերի եւ հրետանու մասնագիտությունների ռազմական կադրերի պատրաստման մասին»,- ասված է մամուլի ծառայության հաղորդագրության մեջ:
