Ներկայում Իրանի միջուկային ծրագրին զսպող միջոցներ չկան։ Այս մասին New Yorker ամսագրին տված հարցազրույցում հայտարարել է «Մոսադ»-ի նախկին տնօրեն, այժմ պաշտպանության նախարարության ռազմաքաղաքական բյուրոյի ղեկավար Զոհար Պալտին։
«Իրանի միջուկային ծրագրի խնդիրն այն է, որ այս պահին չկա դիվանագիտական մեխանիզմ, որը կստիպի նրանց կանգ առնել»,- ասել է Պալտին: «Ոչ մի զսպող գործոն չկա»,- հավելել է նա։ «Իրանն այլեւս չի վախենում... Մենք չենք ուզում հասնել այն կետին, երբ պետք է ինքներս մեզ հարց տանք, թե ինչպես է Իրանին թույլ տրվել հարստացնել (ուրանը) մինչեւ 90 տոկոս»,- հավելել է Պալտին։
Իրանի հարցով ԱՄՆ հատուկ ներկայացուցիչ Ռոբ Մելին հայտարարել է, որ Թեհրանը «կրակի հետ է խաղում» տարածաշրջանում, եւ 2015 թվականի միջուկային համաձայնագրի վերսկսումը վերջնական գործարքը չէ։ «Մենք տեսել ենք, թե ինչպես է ընդլայնվում Իրանի միջուկային ծրագիրը եւ տեսել ենք ինչպես է Թեհրանն ավելի ռազմատենչ դառնում իր տարածաշրջանային գործունեության մեջ»,- ասել է Մելին: «Նրանք սխալ հաշվարկ են անում, կրակի հետ են խաղում».
«Մենք չենք պատրաստվում համաձայնել վատագույն գործարքին, քանի որ Իրանն ընդլայնում է իր միջուկային ծրագիրը»,- հավելել է Մելին: Նրա խոսքով, եթե բանակցություններն առաջ չընթանան, գործարքը վերսկսելու փորձը «հավասարազոր կլինի մահացած դիակ վերակենդանացնելու փորձին»:
Պետդեպարտամենտի բարձրաստիճան պաշտոնյան ասել է, որ առանց գործարքին վերադառնալու, «ավելի քան ճշմարտանման, հնարավոր եւ նույնիսկ հավանական է», որ Իրանը կփորձի միջուկային շեմային տերություն դառնալ: