Սա մեծ աշխարհաքաղաքական խաղի մի կտորն է, որ հայ-թուրքական հարաբերությունները լավացնելով փորձելու են հետագայում ֆոն ստեղծել, որ վտանգներ չկան, եւ հարց բարձրացնել, որ եթե Թուրքիայի ու Ադրբեջանի հետ լավ հարաբերություններ են, ռուս խաղաղապահները թող գնան, 102-րդ բազան թող գնա: Այս մասին այսօր՝ հունվարի 18-ին, լրագրողների հետ հանդիպման ժամանակ նշեց պաշտպանության նախկին փոխնախարար, ՀՀԿ անդամ Արտակ Զաքարյանը:
Նրա խոսքով, նախկինում միջազգային խաղացողները Հայաստանին հարցնում էին՝ իսկ ձեր շահը որն է, իսկ այսօրվա իշխանություններին չեն հարցնում, որովհետեւ նրանք չեն էլ ձեւակերպել, թե որն է իրենց շահը:
Արտկ Զաքարյանը համաձայն չէ, որ ընդդիմությունն այս իրավիճակում ինտերտ վիճակում է. «Միայն այն, որ ոչ միայն քննադատություն է հնչում, նաեւ այլընտրանքներ են առաջարկվում, խոսվում է վտանգների մասին: Իրենց հենց պետք է, որ մեզ ասեն՝ թալանչի, մենք էլ ասենք՝ թալանչին դուք եք, ու դոփենք տեղում: Հանրությունը հոգնել է այդ խոսակցություններից, պետք է հանրությանը բերել մի վիճակի, որ նա լսի»,-ասաց Արտակ Զաքարյանը:
Նրա խոսքով, այսօր բոլոր ոչ իշխանական ուժերը պետք է կարողանան նույն ուղղությամբ շարժվել առաջ, եթե պետք է իրար դեմ հայտարարություններ անեն, դրանով ջուր են լցնում իշխնության ջրաղացին. «Այնպես չէ, որ ՀՀԿ-ն ինչ անում կամ ասում է, ճիշտ է ասում, այնպես չի, որ «Հայաստան» դաշինքում ամեն ինչ իդեալական է կամ առաջին նախագահի թիմում ամեն ինչ փայլուն է: Քաղաքականությունը նաեւ սխալներ անելու հնարավորությունն է տալիս, որ կարողանաս քո ճշգրտումներն անես: Այսօր գոնե ՀՀԿ-ն այդ ճանապարհի վրա է, բա մյուսներն ի՞նչ են անում, հարգելիներս: Այսօր շատ քաղաքացիներ մեզ մեղադրում են, ասում են՝ ում եք սպասում, ինչու չեք մի բան նախաձեռնում, դա նշանակում է, որ հույս են կապում քո հետ: Եթե մենք պետք է մի բան անենք, հասարակությունն էլի չարձագանքի, կամ գնա անհասկանալի մարդիկ գնան կապիտուլյացիոն ռեժիմ ընտրեն, ուրեմն պատրաստ չեն»:
