Հայաստանը մտադիր է խորացնել Ռուսաստանի հետ համագործակցությունը, հատկապես՝ ռազմական ոլորտում։ Այս մասին հունվարի 27-ին Ազգային ժողովում լրագրողների հետ զրույցում ասաց ԱԺ արտաքին հարաբերությունների մշտական հանձնաժողովի նախագահ, «Քաղաքացիական պայմանագիր» խմբակցության պատգամավոր Էդուարդ Աղաջանյանը։
Միաժամանակ նա չհամաձայնեց այն պնդման հետ, որ 44-օրյա պատերազմից հետո Մոսկվայի ազդեցությունը Հայաստանի վրա մեծացել է։ Պատգամավորի խոսքով՝ երկրի արտաքին քաղաքականությունը հիմնվում է՝ հաշվի առնելով ազգային շահերը։
«44-օրյա պատերազմից հետո Ռուսաստանը սկսեց առանցքային դեր խաղալ Հայաստանում անվտանգության համակարգի կառուցման գործում։ Եվ մենք մտադիր ենք խորացնել համագործակցությունը Մոսկվայի հետ, հատկապես ռազմական ոլորտում»,- ասաց Աղաջանյանը։
