Թեհրանն Էր Ռիադից ուղերձ է ստացել բանակցությունները վերսկսելու պատրաստակամության մասին։ Այս մասին հայտարարել է ԻԻՀ արտաքին գործերի նախարար Հոսեյն Ամիր Աբդոլլահիանը։
«Այս պահի դրությամբ Թեհրանի եւ Էր Ռիադի միջեւ բանակցությունների չորս փուլ է անցկացվել»,- նրա խոսքը մեջբերում է ILNA-ն: Նա նշել է, որ ուղերձ են ստացել սաուդական կողմից՝ բանակցային գործընթացը վերսկսելու պատրաստակամության մասին։
Նա հավելել է, որ «տարածաշրջանային ճգնաժամները կարող են լուծվել միայն երկխոսության ճանապարհով»։
2021թ․ ընթացքում Թեհրանն ու Էր Ռիադը բանակցել են հարաբերությունների կարգավորման հնարավորության շուրջ՝ չորս հանդիպում անցկացնելով Բաղդադում։ Հունվարի 17-ին իրանական լրատվամիջոցները հայտնել են, որ իրանցի երեք դիվանագետներ սկսել են աշխատանքները Սաուդյան Արաբիայի Ջիդդա քաղաքում: Հունվարի 28-ին Իրաքում Իրանի դեսպան Իրաջ Մասջեդին ասել է, որ Թեհրանի եւ Էր Ռիադի միջեւ բանակցությունների հինգերորդ փուլը մոտ ժամանակներս կանցկացվի Բաղդադում։
