Դատավոր Աննա Դանիբեկյանը մերժեց Սահմանադրական դատարան դիմելու փաստաբանի միջնորդությունը։
Հիշեցնենք, որ վերջին նիստի ժամանակ ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը մեղադրանքի անորոշության հետ կապված միջնորդել էր ՍԴ դիմելու համար։ Փաստաբանը նշել էր, որ դիմումի առարկան քրեական դատավարության օրենսգրքում օրենսդրական բացն է։ Օրենսգիրքը դատարանին մեղադրանքը պարզաբանելու հնարավորություն չի տալիս, երբ այն պարզ չէ շարադրված, բայց միեւնույն ժամանակ պարզաբանելու պարտականությունը չի դնում դատախազի վրա։ Միաժամանակ փաստաբանը միջնորդել էր գործի վարույթի կասեցման վերաբերյալ:
Գործով մեղադրյալներ են ՀՀ երկրորդ նախագահ Ռոբերտ Քոչարյանը եւ նախկին փոխվարչապետ, այժմ «Հայաստան» խմբակցության պատգամավոր Արմեն Գեւորգյանը։
Հաջորդ դատական նիստը կկայանա մարտի 15-ին ժամը 13:00-ին։