ԱՄՆ-ը շարունակում է համագործակցել Ռուսաստանի հետ՝ Իրանի միջուկային գործարքը վերսկսելու հարցում։ Այս մասին հայտարարել է ԱՄՆ Պետդեպարտամենտի բարձրաստիճան ներկայացուցիչը՝ նշելով, որ Մոսկվան պետք է հասկանա, որ Ուկրաինայի հետ կապված պատժամիջոցները չպետք է ազդեն համաձայնագրի կատարման վրա, հայտնում է Reuters-ը։
Վաշինգտոնը պատժամիջոցներ չի կիրառի Գործողությունների համատեղ համապարփակ ծրագրի (ԳՀՀԾ) մաս կազմող միջուկային նախագծերում Ռուսաստանի մասնակցության համար, երբ այն ամբողջությամբ իրականացվի, ասել է պաշտոնյան՝ անանունության պայմանով։
Ռուսաստանի արտգործնախարար Սերգեյ Լավրովը երեքշաբթի օրը Մոսկվայում իր իրանցի գործընկեր Հոսեյն Ամիր Աբդոլլահիանի հետ բանակցություններից հետո ասել է, որ ԱՄՆ ենթադրությունները, թե Մոսկվան արգելափակում է Իրանի հետ միջուկային համաձայնագիրը վերսկսելու ջանքերը, իրականությանը չեն համապատասխանում:
Լավրովն ասել է, որ Ռուսաստանը գրավոր երաշխիքներ է ստացել ԱՄՆ-ից, որ Ուկրաինայի պատճառով Մոսկվայի դեմ պատժամիջոցները չեն խանգարի համաձայնագրի շրջանակներում համագործակցությանը:
Պատասխանելով Լավրովի մեկնաբանությունների մասին հարցին՝ ԱՄՆ պաշտոնյան ասել է․ «Իհարկե, մենք պատժամիջոցներ չենք կիրառի ԳՀՀԾ-ի մաս կազմող միջուկային նախագծերին Ռուսաստանի մասնակցության համար»։
«Մենք չենք կարող Ռուսաստանին որեւէ երաշխիք տրամադրել եւ չենք մեկնաբանի Լավրովի հրապարակային հայտարարությունները»,- հավելել է պաշտոնյան։ «Միգուցե հիմա Մոսկվայի համար պարզ է, որ, ինչպես մենք հրապարակավ հայտարարել ենք, Ռուսաստանի դեմ նոր պատժամիջոցները կապված չեն ԳՀՀԾ-ի հետ եւ չպետք է որեւէ ազդեցություն ունենան դրա իրականացման վրա»:
