Իրանը տեղեկացրել է Ատոմային էներգիայի միջազգային գործակալությանը (ԱԷՄԳ) այն մասին, որ անջատելու է իր միջուկային օբյեկտների մշտադիտարկման 27 տեսախցիկ։ Այս մասին տեղեկացրել է ԱԷՄԳ-ի գլխավոր տնօրեն Ռաֆայել Գրոսին։
«Մենք տեղեկացվել ենք, որ Իրանում 27 տեսախցիկ կանջատվի մշտադիտարկման համակարգից»,- ասել է Գրոսին Վիեննայում կայացած մամուլի ասուլիսում։
Գրոսին սա «լուրջ մարտահրավեր» է անվանել Իրանում ԱԷՄԳ-ի աշխատանքի եւ այն բանի հաստատման համար, որ Թեհրանը հետեւում է Գործողությունների համատեղ եւ համապարփակ ծրագրին (ԳՀՀԾ) Իրանի միջուկային ծրագրի վերաբերյալ։ Նա ավելացրել է, որ ԱԷՄԳ-ի 40 խցիկ դեռեւս շարունակում է աշխատանքն Իրանում։
