Իրանը չափազանց մեծ պահանջներ չի ներկայացնում ԳՀԾԾ-ի վերականգնման շուրջ բանակցություններում։ Այս մասին հայտարարել է Իրանի արտաքին գործերի նախարար Հոսեյն Ամիր-Աբդոլլահիանը՝ Կատարի ԱԳ նախարար Մուհամմեդ բեն Աբդուլռահման Ալ Թանիի հետ համատեղ մամուլի ասուլիսում։
Բարձր գնահատելով անցած շաբաթ Դոհայում բանակցությունների ընթացքում Կատարի կառավարության հյուրընկալությունը՝ նա նշել է, որ Կատարի էմիրը եւ Ալ Թանին մեծ ջանքեր են գործադրել բանակցություններն առաջ տանելու համար։
«Մենք հաստատակամ ենք լավ, ամուր եւ տեւական համաձայնության հասնելու հարցում»,- նշել է իրանցի նախարարը, ինչն, ի տարբերություն ամերիկյան որոշ լրատվամիջոցների պնդումների, նշանակում է, որ Իրանը չափազանցված պահանջներ չունի ԳՀՀԾ-ում։
«Դոհայում վերջերս կայացած բանակցություններում հիմնական հարցերից մեկը, որի վրա մենք կենտրոնացել ենք, ԱՄՆ-ի կողմից արդյունավետ երաշխիքների հարցն է այն ամենի ոլորտում, ինչը կազդի Իրանի կողմից ԳՀՀԾ-ից լիարժեք տնտեսական օգուտներ ստանալու վրա։ Ուստի մեր պահանջը չափազանցված չէ, սակայն երաշխիքներ ստանալու ճանապարհին ԱՄՆ-ը պետք է պարտավորվի, որ Իրանի Իսլամական Հանրապետությունը կօգտվի 2015 թվականի համաձայնագրի բոլոր արտոնություններից։ Սա այն է, ինչ ամերիկյան կողմը դեռ չի կարողացել մեզ հավաստիացնել։ Եվս մեկ անգամ ընդգծում եմ, որ մենք լավ մտադրություններ ունենք, մենք տրամաբանական բանակցողներ ենք եւ լուրջ ենք տրամադրված այս ուղղությամբ»,- ասել է Ամիր-Աբդոլլահիանը։
Կատարցի բարձրաստիճան դիվանագետն իր հերթին ասել է, թե «կարեւոր է, որ բոլոր կողմերն ու գործընկերները հարեւան երկրներում կառուցողական ջանքեր գործադրեն միջուկային ոլորտում առաջընթացի հասնելու եւ տարածաշրջանային երկխոսություն սկսելու համար»։
