Եվրամիությունը մտադիր է մինչեւ սեպտեմբեր մոտ 8 միլիարդ եվրո արժողությամբ ֆինանսավորման եւս մի փաթեթ նախապատրաստել Ուկրաինայի համար, հայտնում է Reuters-ը՝ վկայակոչելով աղբյուրը Գերմանիայի կառավարությունում։

Փաթեթի մի մասը բաղկացած է լինելու դրամաշնորհներից, որոնք մարման կարիք չունեն, իսկ մյուս մասը՝ վարկերից։

Մայիսին G-7-ի ֆինանսական ղեկավարները պայմանավորվել են 9.5 միլիարդ դոլարի նոր օգնություն տրամադրել Ուկրաինային, հիմնականում՝ ԱՄՆ-ից: Գերմանիան մայիսյան փաթեթում 1 միլիարդ եվրո է ներդրել, որն արդեն վճարել է։

Գերմանիան եւս իր ներդրումը կունենա օգնության նոր փաթեթում, ասել է աղբյուրը՝ հավելելով, որ ԵՄ մյուս երկրները, ինչպիսիք են Իտալիան եւ Ֆրանսիան, առայժմ ձեռնպահ են մնում, եւ որ Բեռլինն այս հարցով սերտ կապի մեջ է իր եվրոպացի գործընկերների եւ Եվրահանձնաժողովի հետ։

Այս շաբաթվա սկզբին Ուկրաինայի նախագահ Վլադիմիր Զելենսկին հայտարարել էր, որ պետական ​​բյուջեի դեֆիցիտն ամսական 5 միլիարդ դոլար է կազմում։