Լեհաստանը Եվրամիության վերականգնման հիմնադրամից գումար կստանա միայն այն բանից հետո, երբ հասնի այն ցուցանիշներին եւ նպատակներին, որոնք Լեհաստանի կառավարությունը համաձայնեցրել է ԵՄ-ի հետ ամիսներ շարունակվող բանակցությունների ընթացքում, հայտարարել է Եվրահանձնաժողովը, փոխանցում է Reuters-ը։
Լեհաստանը դրամաշնորհների տեսքով 24 միլիարդ եվրո եւ շատ էժան վարկերի տեսքով 11.5 միլիարդ եվրո ստանալու իրավունք ունի՝ իր տնտեսությունը վերականգնելու համար:
Սակայն այդ գումարը սառեցված է, քանի որ Լեհաստանի իշխող «Օրենք եւ արդարություն» կուսակցությունը չի ցանկանում չեղարկել վերջին յոթ տարիների ընթացքում իրականացված դատական համակարգի բարեփոխումները, թեեւ դա այն պայմաններից մեկն է, որը համաձայնեցվել է հանձնաժողովի հետ համատեղ։
«Օրենք եւ արդարություն» կուսակցության ղեկավարներն այս շաբաթ խոստացան, որ որեւէ զիջման չեն գնա եւ սպառնացին խոչընդոտել ԵՄ որոշումների կայացմանը, եթե Լեհաստանը չկարողանա օգտվել ԵՄ հիմնադրամից:
«Հանձնաժողովը եւ Լեհաստանը ամիսներ շարունակ մանրամասն քննարկել են այդ ծրագիրը, այն ստորագրվել է երկու կողմերի կողմից, ուստի թյուրիմացությունների տեղ չկա»,- հերթական ճեպազրույցի ժամանակ հայտարարել է Եվրահանձնաժողովի ներկայացուցիչը։
