Աշխարհի ամենահարուստ մարդը՝ Իլոն Մասկը, հուսով է, որ իր Neuralink ընկերության տեխնոլոգիան թույլ կտա մարդկանց արդյունավետորեն ինտեգրվել արհեստական բանականությանը: Այս մասին Մասկը գրել է չինական China Cyberspace ամսագրի համար իր հոդվածում։
Նա նշել է, որ Neuralink-ը կենտրոնացած է համակարգչի եւ մարդու ուղեղի միաձուլման տեխնոլոգիաների մշակման, մետաղադրամի չափի ուղեղի չիպերի մշակման վրա, որոնք նման են սմարթֆոններին, բացառությամբ, որ դրանք ավելի խորն են ինտեգրվում օգտատիրոջ մարմնի մեջ՝ գրանցում եւ խթանում են ուղեղի ակտիվությունը ուղեղի կեղեւում տեղադրված իմպլանտների միջոցով:
«Այս փուլում տեխնոլոգիան օգնում է տուժածներին անհատական մակարդակով: Բազմաթիվ տխուր նամակներ ենք ստանում՝ 25-ամյա երիտասարդն ուժերի ծաղկման շրջանում մոտոցիկլետով վթարի է ենթարկվել, ինչի պատճառով չի կարողանում ինքնուրույն ուտել, ինչը մեծ վիշտ է թե՛ իր, թե՛ իր ընտանիքի համար։ Հաշվի առնելով այս հանգամանքը, «ուղեղ-մեքենա» ինտերֆեյսի տեխնոլոգիան առաջիկա տարիներին կուղղվի ուղեղի վնասվածքների եւ այլ հարակից խանգարումների բուժմանը կամ մեղմացմանը: Օրինակ, այն կարող է օգնել վերականգնել ողնաշարի վնասվածքներ եւ հոգեկան խանգարումներ ունեցող մարդկանց զգայական կամ շարժողական ֆունկցիան, կամ թույլ տալ կաթվածահար մարդկանց օգտագործել իրենց ուղեղը պարզապես համակարգիչներ կամ բջջային հեռախոսներ աշխատեցնելու համար:
Այս տեխնոլոգիան կարող է նաեւ բարելավել ուղեղի վնասման հետ կապված խնդիրների ավելի լայն շրջանակ՝ անկախ նրանից՝ այդ խանգարումները բնածին են, պատահական, կամ տարիքային եւ շրջակա միջավայրի սթրեսային գործոնների պատճառով, ներառյալ ծանր դեպրեսիան, հիվանդագին ճարպակալումը, քնի խնդիրները եւ հիմքում ընկած շիզոֆրենիան:
«Ուղեղ-մեքենա» ինտերֆեյսի տեխնոլոգիայի զարգացմամբ երկարաժամկետ հեռանկարում ակնկալվում է, որ այս կապը կընդլայնի արտաքին աշխարհի եւ մարդու ուղեղի միջեւ հաղորդակցման ուղիները, «հասանելիություն ձեռք բերելով» դեպի ուղեղի ավելի շատ տարածքներ եւ նոր նյարդային տվյալներ: Այս տեխնոլոգիան կարող է մարդկանց հնարավորություն տալ արդյունավետորեն ինտեգրվել արհեստական բանականությանը, ի վերջո, մարդկանց հնարավորություն տալ շփվելու աշխարհի, իրենց եւ ուրիշների հետ: Նույնիսկ եթե «մարդ-մեքենա» ինտեգրման նպատակն անհասկանալի է, «ուղեղ-մեքենա» ինտերֆեյսի տեխնոլոգիան կարող է մեծ փոփոխություն մտցնել բժշկական վերականգնման ոլորտում»,- ասել է նա:
