«Սուրմալու» առեւտրի կենտրոնում տեղի ունեցած պայթյունից հետո աշխատանքի ժամանակ ուղղաթիռի կարիք չի եղել։ Այս մասին օգոստոսի 22-ին լրագրողների հետ զրույցում ասաց ԱԻՆ Փրկարար ծառայության պետի տեղակալ Հովհաննես Եմիշյանը։
Նա պարզաբանեց, որ ԱԻՆ-ը, անհրաժեշտության դեպքում, անվճար օգտագործում է ՊՆ ուղղաթիռները։
«Ինչ վերաբերում է տեխնիկական բնութագրերին, ապա ՊՆ մեկ ուղղաթիռ արդեն վերասարքավորվել է Արտակարգ իրավիճակների նախարարության կարիքների համար։ Եվս մեկի վրա համապատասխան աշխատանքներ են տարվում»,- ընդգծեց Եմիշյանը։
Նրա խոսքով, բոլոր զարգացած երկրներում մի քանի գերատեսչություններ ունեն ընդհանուր օգտագործման տեխնիկա։
«Սա թույլ է տալիս խուսափել մեծ ծախսերից, քանի որ խոսքը շահագործման ընթացքում սպասարկման լուրջ ծախսերի մասին է»,- հավելեց նա:
Հիշեցնենք, որ ավիացիայի հարցերով Նիկոլ Փաշինյանի նախկին խորհրդական Հակոբ Ճաղարյանը «Սուրմալու» առեւտրի կենտրոնում տեղի ունեցած պայթյունի հաջորդ օրը Փաշինյանին մեղադրել էր «հանցավոր անգործության մեջ, որն առաջացրել է ծանր հետեւանքներ»։
«2019 թվականի հունիսին ես գտա Հայաստանի համար լավագույն ուղղաթիռը, որը կարող էր օգտակար լինել հրդեհաշիջման եւ փրկարարական աշխատանքների համար եւ մեկ միավորի համար ընդամենը 300 000 դոլարով։ Փաշինյանն ասաց, որ ուղղաթիռները հին են, ուկրաինական, եւ դրանց ձեռքբերումն աննպատակահարմար է»,- այն ժամանակ գրել էր Ճաղարյանը։