Հայաստանի եւ Ռուսաստանի իշխանությունների միջեւ դասակարգային հակասություն կա, եւ այդ հակասությունը մեզ վրա բացասաբար կանդրադառնա այնքան ժամանակ, քանի դեռ Հայաստանում իշխանության փոփոխություն տեղի չի ունեցել։ Այս մասին սեպտեմբերի 1-ին լրագրողների հետ զրույցում ասաց «Հայաստան» խմբակցության պատգամավոր Անդրանիկ Թեւանյանը։
«Ռուսաստանն ակնհայտորեն չի վստահում Հայաստանի ներկայիս իշխանություններին։ Այս անվստահության հետեւանքով մեր երկրի վրա ճնշում է գործադրվում, այդ թվում՝ աշխարհաքաղաքական նշանակության։ Խնդիրները պետք է կարգավորվեն Հայաստանի ներսում, սա ներքաղաքական հարց է։ Միայն Հայաստանում իշխանափոխության դեպքում կարող ենք խուսափել անվտանգությանը սպառնացող վտանգներից ու աղետից»,- նշեց պատգամավորը։
Նրա գնահատմամբ, Հայաստանը կռվախնձոր է դարձել միջազգային խաղացողների համար, հայտնվել է Արեւմուտքի եւ Ռուսաստանի միջեւ։
«Արեւմուտքին անհրաժեշտ է ցանկացած ձեւով Ղարաբաղի հարցի շուտափույթ լուծում, որպեսզի վերջ դրվի Ռուսաստանի ռազմական ներկայությանը Ղարաբաղում եւ Հայաստանում։ Իսկ Մոսկվան, ընդհակառակը, շահագրգռված է, որ Ղարաբաղի հարցը առկախ մնա, որպեսզի նրա ներկայությունը Ղարաբաղում արդարացված ու հիմնավորված լինի։ Արեւմուտքն ու Ռուսաստանը կողմ են սահմանազատմանը եւ սահմանագծմանը, հաղորդակցությունների ապաշրջափակմանը, բայց ամեն մեկն այս ամենը տեսնում է իր մոդելում եւ իր ծրագրերի շրջանակներում։
Ֆորմալ առումով իշխանությունները նույն «Զանգեզուրի միջանցքի» հարցում դեմ են արտահայտվում, բայց պետք է իմունիտետ ունենան ու պաշտպանեն սեփական շահերը։ Երբ դա տեղի չի ունենում, ապա աշխարհաքաղաքական ուժային կենտրոններն առաջ են տանում իրենց շահերը»,- ընդգծեց Թեւանյանը։