Հայաստան ԱՄՆ Կոնգրեսի Ներկայացուցիչների պալատի խոսնակ Նենսի Փելոսիի այցից որեւէ ակնկալիք չկար։ Թեեւ նրա այցը կարեւոր է, քանի որ ամեն օր չէ, որ ԱՄՆ-ից նման բարձրաստիճան պաշտոնյա է գալիս Հայաստան, բայց դա նույնպես չի կարելի գերագնահատել։ Այս մասին NEWS.am-ի թղթակցի հետ զրույցում ասաց քաղաքագետ Ալեքսանդր Իսկանդարյանը։
«Նա շատ հայտնի է իր հայանպաստ դիրքորոշմամբ, եւ այդ դիրքորոշման մեջ ոչ մի նոր բան չկա»,- կարծում է փորձագետը։
Նրա գնահատմամբ, Ադրբեջանի հետ առճակատման, սահմանին բախումների հետ կապված փոփոխություններ չեն կարող լինել։ Իսկանդարյանը նշեց, որ Փելոսիի այցը վաղուց էր նախատեսված, եւ այն համընկավ սահմանին բախումների հետ։
«Սա կարող է ինչ-որ կերպ ազդել, կարող է կանգնեցնել որոշ միտումներ, արգելակել, բայց ոչ բացառել: Չեմ կարծում, որ ԱՄՆ-ից սպառազինության զանգվածային մատակարարումներ պետք է սպասել։ Դա լուրջ չէ։ Միանգամայն հնարավոր է պատկերացնել զրահաբաճկոնների կամ գիշերային տեսանելիության սարքերի մատակարարումներ, սակայն շրջել այն հանգամանքը, երբ Հայաստանը Ռուսաստանի Դաշնությունից գնում է իր զենքի ավելի քան 95 տոկոսը, ֆանտազիայի ոլորտից է։ Ավելին, Փելոսին այս ամենի հետ կապ ունենալ չի կարող, քանի որ նա դրանով չի զբաղվում»,- հավելեց Իսկանդարյանը։
Փորձագետը պաշտպանության նախարարի հետ Փելոսիի հանդիպման իմաստը բացատրեց նրանով, որ Հայաստանն այժմ կանգնած է անվտանգության խնդրի առաջ՝ հիշեցնելով, որ վերջերս Սուրեն Պապիկյանն այցելել էր ԱՄՆ եւ այնտեղ քաղաքական հանդիպումներ էր ունեցել։
«Հայաստան ժամանելը նշանավորվեց համապատասխան հայտարարություններով։ Նախ, այսպիսով, արտահայտվեց բարոյական դիրքորոշում։ Նա հայտնի է նման քայլեր անելու իր կարողությամբ եւ հնարավորությամբ: Ինչ արժեր միայն նրա վերջին այցը Թայվան, չնայած Չինաստանի հակազդեցությանը:
Նրա այցի մեջ կա նաեւ ներքաղաքական բաղադրիչ։ ԱՄՆ-ում շուտով ընտրություններ են տեղի ունենալու, եւ այս երկրի հայազգի քաղաքացիները շատ հաճախ քվեարկում են համախմբված՝ կախված այս կամ այն ուժի վերաբերմունքից այն ամենի հանդեպ, ինչը կապված է Հայաստանի հետ։ Մյուս կողմից, չի կարելի ասել, որ հայ ընտրողները կարող են շրջել ԱՄՆ ընտրությունները»,- եզրափակեց քաղաքագետը։