Ադրբեջանը ձգտում է հայկական տարածքների հետագա օկուպացման եւ հայ-ադրբեջանական սահմանին իրավիճակի սրման։ Այս մասին Fox News Digital-ին տված հարցազրույցում ասել է Հայաստանի անվտանգության խորհրդի քարտուղար Արմեն Գրիգորյանը։
«Մեր գնահատականը նախկինի պես այն է, որ Ադրբեջանը շարունակում է ձգտել Հայաստանի տարածքների հետագա օկուպացման եւ հայ-ադրբեջանական սահմանին իրավիճակի հետագա սրման»,-ասել է Գրիգորյանը՝ նշելով, որ 21-րդ դարում Ադրբեջանը խնդրի լուծումը տեսնում է ուժի մեջ։
Նրա խոսքով՝ Հայաստանը պատրաստ է դիվանագիտական համագործակցության։ «Զենքը մեր բանակցային ճանապարհը չէ, եւ մենք վստահ ենք, որ միջազգային հանրության ավելի մեծ ներգրավվածությունը մեր տարածաշրջանում կնպաստի ավելի մեծ կայունության եւ խաղաղության»,-ասել է նա։
Խոսելով Ռուսաստանի կողմից Ադրբեջանին զենք մատակարարելու մասին՝ Գրիգորյանը նշել է, որ դրանում «ոչ մի նոր բան» չկա, սա «երկար պատմություն» է, որը Հայաստանը քննարկել է Ռուսաստանի Դաշնության հետ։