Սեպտեմբերի 12-ի լույս 13-ի գիշերը Ադրբեջանի սանձազերծած հարձակման հետեւանքով զոհվել է Զինված ուժերի սպա, ավագ լեյտենանտ Հրանտ Նորայրի Եղիազարյանը։
33–ամյա Հրանտ Եղիազարյանը Արագածոտնի մարզի Արագածավան բնակավայրից էր։ Նա սովորել էր Վազգեն Սարգսյանի անվան ռազմական համալսարանը եւ ծառայության անցել Հայաստանի Զինված ուժերում։ Հրանտը երկար տարիներ ծառայել է Արցախի Հանրապետության Մարտակերտ քաղաքում, ապա տեղափոխվել Կապան։
«Հրանտը վաշտի հրամանատար էր։ Սեպտեմբերի 12-ին նա հանձնում–ընդունում էր արել ու դիրքերից իջել տուն։ Կեսգիշերին մոտ, երբ կռիվը սկսվել է, Հրանտն իմացել է, որ վիրավորների հետեւից գնացող շտապօգնության մեքենան թիրախավորվել է թշնամու կողմից։ Ինքը կապ է հաստատել իր վերադասի հետ եւ կռվով–դավով համոզել, որ պետք է գնա դիրքերում գտնվող իր զինվորների հետեւից։ Ասել է՝ «ես պետք է գնամ, իմ երեխեքն ինձ են սպասում, ես պետք է հասնեմ իրենց»։ Ճանապարհին, սակայն, իրենց մեքենան արկի պայթյունից վնասվել է։ Հրանտի ոտքը լուրջ վնասվածք է ստացել, փրկված տղաներից մեզ պատմեցին, որ ինքը էդ վիճակում կռվել է, ամեն ինչ արել է, որ հասնի իր զինվորներին։ Հրանտը զոհվել է հենց էդ մարտերի ժամանակ»,– NEWS.am-ի հետ զրույցում պատմեց նրա հարազատներից՝ Ժենյան։
Հրանտից հարազատները լուր չունեին սեպտեմբերի 13–ից։ Նա անհետ կորած էր համարվում։ Սեպտեմբերի վերջին նրա աճյունը դուրս է բերվել Կարմիր Խաչի միջազգային կազմակեպության միջնորդության շնորհիվ։ Հրանտին հուղարկավորել են հոկտեմբերի 7–ին, Արագածավանի զինվորական պանթեոնում։
Հրանտ Եղիազարյանը ամուսնացած էր, ունի 2–ամյա դուստր։
Հիշեցնենք, որ սեպտեմբերի 13-ին՝ ժամը 00:05-ից, Ադրբեջանի ԶՈՒ ստորաբաժանումները սահմանի ողջ երկայնքով հրետանային միջոցներից, խոշոր տրամաչափի հրաձգային զինատեսակներից սկսել էին ինտենսիվ կրակ վարել հայկական դիրքերի ուղղությամբ՝ կիրառելով նաեւ ԱԹՍ-ներ: Հակառակորդը հարվածում էր թե՛ ռազմական, թե՛ քաղաքացիական օբյեկտներին։
Պաշտպանության նախարարության հաղորդմամբ՝ սեպտեմբերի 14–ին, ժամը 20։00–ից բոլոր ուղղություններով կրակը գրեթե դադարել է, էական միջադեպեր չեն արձանագրվել։
Վերջին տվյալով՝ զոհվածների եւ անհետ կորածների թիվը հասնում է 207-ի, գերեվարվել էր 20 զինծառայող։ Հոկտեմբերի 4–ին, ադրբեջանական կողմը ԱՄՆ միջնորդությամբ, հայկական կողմին է վերադարձրել 17 հայ ռազմագերիների։
