Ես պահանջում եմ իմ թոռանը, 19 տարեկան իմ Վահեին: Այս մասին այսօր՝ հոկտեմբերի 10-ին, ՊՆ-ի մոտ լրագրողների հետ զրույցում ասաց սեպտեմբերի 13-ից հետո անհետ կորած համարվող Վահե Թորոսյանը տատը՝ Սեդա Թորոսյանը:
«Ավելի քան 20 օր է անցել, ոչ մեկ չի հետաքրքրվում երեխու վիճակով, որ երեք տեղից վիրավոր երեխեն պառկած է։ Վերջին զանգը եղել է սեպտեմբերի 15-ին։ Դրանից հետո որևէ լուր չունենք։ 4-5 անգամ գնացել են Կապան, քանի օր մնացել, ոչ մեկ չի հետաքրքրվում: Ինչու չեն մտնում էդ գոտի: Մենք պահանջում ենք մեր երեխուն»,-ասաց զինծառայողի տատը:
«Այդ երեխան միայն իրենցը չէ, մերն էլ է։ Սուրեն Պապիկյան, հե՞շտ է այս ամենը»,-հավելեց ակցիայի մասնակից հարևանուհին։
Նշենք, որ սեպտեմբերի 13-ին Ադրբեջանի հարձակումից հետո անհետ կորած արմավիրցի զինծառայողի՝ Վահե Թորոսյանի հայրը, տատը, նրանց հարազատներն ու ընկերներն այս պահին բողոքի ակցիա են իրականացնում պաշտպանության նախարարության շենքի դիմաց՝ դժգոհելով պետական մարմնինների անգործությունից։ Նրանք պահանջում են, որ նախարարությունը կատարի անհրաժեշտ քայլերը, գործողությունները, անտառից դուրս բերի վիրավոր տղային։ Վահեի հարազատները համոզված են՝ զինվորը ողջ է։
Նրա բողոքին միացել են ընկերները, հարազատները։
Հիշեցնենք, որ սեպտեմբերի 12-ի լույս 13-ի գիշերը Ադրբեջանի զինված ուժերը լայնածավալ ագրեսիա են սկսել Հայաստանի Հանրապետության ինքնիշխան տարածքի նկատմամբ՝ խոշոր տրամաչափի զինատեսակների, հրետանու, հրթիռային համակարգերի, անօդաչու թռչող սարքերի կիրառմամբ:
Ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում՝ զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող:
