Պարսից ծոցում Իրանի արաբ հարեւանները միջոցներ կձեռնարկեն իրենց անվտանգությունն ամրապնդելու համար, եթե Թեհրանը միջուկային զենք ստանա: Այս մասին հայտարարել է Սաուդյան Արաբիայի արտգործնախարար Ֆեյսալ բեն Ֆարհան Ալ Սաուդը, հայտնում է Reuters-ը։
ԱՄՆ-ի եւ Իրանի անուղղակի բանակցությունները, որոնք ուղղված են համաշխարհային տերությունների եւ Իրանի միջեւ 2015 թվականին կնքված միջուկային համաձայնագիրը փրկելուն, որից Վաշինգտոնը 2018 թվականին դուրս է եկել, սեպտեմբերին փակուղի են մտել: ԱԷՄԳ-ի ղեկավարը մտահոգություն է հայտնել Թեհրանի վերջին հայտարարության առնչությամբ, որ ինքը զարգացնում է հարստացման կարողությունները:
«Եթե Իրանը ստանա գործող միջուկային զենք, ապա բոլոր խաղադրույքները կհանվեն»,- ասել է արքայազն Ֆեյսալ բեն Ֆարհան Ալ Սաուդը: «Տարածաշրջանում մենք գտնվում ենք շատ վտանգավոր տարածության մեջ... տարածաշրջանի պետություններն անպայման կուսումնասիրեն իրենց անվտանգությունն ապահովելու հնարավորությունները»։
Թեեւ Էր Ռիադը շարունակում է «թերահավատորեն» վերաբերվել Իրանի միջուկային գործարքին, արքայազն Ֆեյսալն ասել է, որ աջակցում է համաձայնագրի վերականգնմանն ուղղված ջանքերին՝ «պայմանով, որ դա Թեհրանի հետ ավելի ամուր գործարքի մեկնարկային կետ լինի, այլ ոչ թե վերջնական կետ»:
Պարսից ծոցի արաբական պետությունները ձգտում են ավելի կոշտ գործարքի, որը կվերացնի Իրանի հրթիռային ծրագրի եւ անօդաչու թռչող սարքերի վերաբերյալ նրանց մտահոգությունները:
«Մենք իրանցիներից լսում ենք, որ նրանք շահագրգռված չեն միջուկային զենքի ծրագրով, շատ հաճելի կլիներ հավատալ դրան: Այս մակարդակում մեզ ավելի շատ վստահություն է պետք»:
Իրանը հայտարարում է, որ իր միջուկային տեխնոլոգիաները միայն քաղաքացիական նպատակների համար են:
