![](img/news/73/58/07/default.jpg)
Ատոմային էններգիայի միջազգային գործակալության (ԱԷՄԳ) փորձագետների խումբը կիրակի մեկնել է Թեհրան՝ իրանական երեք չհայտարարված օբյեկտներում հարստացված ուրանի մասնիկների ծագման հետաքննության շրջանակում, տեղեկացրել է Al Jazeera հեռուստաալիքը։
«Պատվիրակությունը, որը կազմված է Ատոմային էներգիայի միջազգային գործակալության հինգ ներկայացուցչից, կիրակի եկել է Թեհրան՝ Իրանի ատոմային էներգիայի կազմակերպության եւ արտաքին գործերի նախարարության հետ նոր բանակցություններ անցկացնելու համար»,- նշվել է հաղորդագրությունում։
Իրանի ատոմային էներգիայի կազմակերպության ղեկավար Մոհամադ Էսլամին դեկտեմբերի 14-ին հայտարարել էր, որ ԱԷՄԳ-ի ներկայացուցիչներն այցելելու են Թեհրան առաջիկա օրերին։ Նույն օրը Al-Arabia հեռուստաալիքը, հղում կատարելով ԱԷՄԳ-ի պաշտոնական ներկայացուցչի հայտարարությանը, տեղեկացրել էր, որ գործակալության փորձագետները դեկտեմբերի 18-ին կայցելեն իսլամական հանրապետություն։ Կազմակերպության ներկայացուցչի խոսքով՝ այցի ընթացքոմ կողմերը մտադիր են քննարկել Իրանի կողմից այն երաշխիքների վերաբերյալ պարտավորությունների կատարման հարցերը, որոնք նախատեսված են Միջուկային զենքի չտարածման մասին պայմանագրով (ՄԶՉՊ)։
ԱԷՄԳ-ի գլխավոր տնօրեն Ռաֆայել Գրոսին նոյեմբերի 10-ին հայտարարել էր, որ Վիեննայում իրանական կողմի հետ բանակցություններն ավարտվել են առանց որեւէ արդյունքի։ Հետագայում Reuters գործակալությունը, հղում կատարելով ԱԷՄԳ-ին, տեղեկացրել էր, որ Թեհրանը համաձայնել է, որ նոյեմբերին գործակալության (որն զբաղվում է իսլամական հանրապետությունում երեք չհայտարարված օբյեկտներում ուրանի մասնիկների ծագման հետաքննությամբ) ներկայացուցիչներն այցելեն Թեհրան։ ԱԷՄԳ-ի տեսուչների համար այդ օբյեկտների հասանելիությունն ապահովելու պահանջն իրանական միջուկային ծրագրի վերաբերյալ Գործողությունների համատեղ եւ համապարփակ ծրագրի (ԳՀՀԾ) վերականգնման կարեւոր պայմաններից մեկն է։ Իրանի ԱԳՆ պաշտոնական ներկայացուցիչ Նասեր Քանաանի Չաֆին հաստատել է, որ ԱԷՄԳ-ի այցը նախատեսված էր, սակայն նոյեմբերի 16-ին Էսլամին հայտարարել էր, որ օրակարգում այցի հարցը չի դրված։ Գրոսին իր կողմից նշել էր, որ գործակալությունը պատրաստ է շարունակել աշխատանքն Իրանի հետ երաշխիքների չլուծված հարցի վերաբերյալ եւ հույս ունի, որ տեխնիկական հանդիպումը կկայանա։