Արեւմուտքը չի կարող իրական ճնշում գործադրել Բաքվի վրա, քանի որ այնտեղ գերիշխում են բոլորովին այլ խաղացողներ։ Եվրոպական ազդեցությունը բավականին փոքր է։ Միգուցե, եթե Ամերիկան ներգրավվեր այս խնդիրների լուծմանը, ապա ինչ-որ բան կարելի էր անել։ Այս մասին NEWS.am-ի «Ուժի գործոն» հաղորդաշարի թղթակցի հետ զրույցում ասաել է Գերմանիայից ժամանած քաղաքագետ Ալեքսանդր Ռարը։
Նա կարծում է, որ վերջին 30 տարիների ընթացքում՝ մինչեւ 2020 թվականը, Հայաստանը մեծ աջակցություն է ստացել Արեւմուտքից, որտեղ շատ են վիճել այն մասին, թե իրականում ինչն է գերիշխում միջազգային իրավունքում՝ պետության ինքնիշխան տարածքի անձեռնմխելիությո՞ւնը, թե՞ ինքնավարության սկզբունքը։
«Մեծ վեճեր եղան, սակայն Կոսովոն անկախացավ, եւ դա ձեռնտու էր Հայաստանին, որը կարող էր ասել, որ Լեռնային Ղարաբաղում նա պաշտպանում էր իր ազգային փոքրամասնությանը Ադրբեջանից, ուստի համաշխարհային հանրության մի մասը Հայաստանի կողմից էր: Իրավիճակը փոխվեց ուկրաինական պատերազմի սկսվելուց եւ դրանից առաջ սկսված հակամարտություններից հետո։ Ամբողջ Արեւմուտքը հաստատակամորեն որդեգրել է այն դիրքորոշումը, որ ազգային փոքրամասնությունների ինքնորոշման հարցը հետին պլան է մղվել։ Եվ Հայաստանն այս առումով լուրջ աջակցություն է կորցրել, Արեւմուտքում միջազգային իրավունքը սկսել են այլ կերպ մեկնաբանել։ Ուստի Արեւմուտքը կաջակցի Ադրբեջանի դիրքորոշումներին», - ընդգծել է քաղաքագետը։
