Հայաստանի բազմաթիվ ցավակցությունները Թուրքիային չափից շատ են։ Այս մասին Ազգային ժողովում, ավանդական ճեպազրույցների ժամանակ, փետրվարի 13-ին ասել է ընդդիմադիր պատգամավոր, Հայաստանի Հանրապետական կուսակցության անդամ Տիգրան Աբրահամյանը։
Նրա կարծիքով՝ միշտ պետք է հիշել եւ հաշվի առնել թուրքական կողմի թշնամական վերաբերմունքը Հայաստանի ու նրա բնակչության հանդեպ։ «Չպետք է մոռանալ նաեւ նրա ակտիվ դերի մասին Բաքվին 44-օրյա պատերազմում, ինչպես նաեւ Հայաստանի դեմ ուղղված հետագա ագրեսիվ գործողություններում աջակցելու հարցում »,- ասել է պատգամավորը։
Նրա կարծիքով՝ ներկայիս իշխանությունների վերաբերմունքը Թուրքիայի հանդեպ չի տեղավորվում ոչ մի տրամաբանական շրջանակում։ «Ես կհասկանայի Հայաստանի ղեկավարությանը, եթե նա սահմանափակվեր ցավակցական մի ինչ-որ չոր տեքստով։ Բայց մենք տեսնում ենք ուղերձների եւ նամակների ներկայիս փոխանակությունը։ Խոսվում է ինչ-որ աջակցության մասին։ Ուղարկվել է մի քանի մեքենա հումանիտար օգնություն։ Բայց ինչն է հատկանշական. Թուրքիա եւ Հայաստանի բարեկամ Սիրիա ուղարկվել են գրեթե հավասար թվով փրկարարներ»,- տարակուսանք է հայտնել Աբրահամյանը։
Նա Հայաստանի՝ որպես պետության հանդեպ Թուրքիայի վարքը եւ պաշտոնական Երեւանի ներկա գործողությունները համահունչ չի համարում։ Քաղաքական գործիչը վստահ չէ, որ Անկարայի հետագա քաղաքականությունը Հայաստանի հանդեպ կորոշվի իրեն ցուցաբերված հումանիտար օգնությամբ կամ գործող իշխանությունների բազմաթիվ ցավակցություններով։
