Արդեն մեկ ամիս անցել է դեպքից, բայց ես չեմ տեսել մեր ղեկավարությունից մեկը գար, ասեր՝ ցավակցում ենք. հուղարկավորության օրն էլ որեւէ մեկը չի եկել: Այս մասին այսօր՝ փետրվարի 20-ին, ՊՆ-ի շենքի դիմաց բողոքի ակցիայի ժամանակ նշեց հունվարի 19-ին Ազատ գյուղի զորամասի կացարանի հրդեհից մահացած զինվորներից մեկի՝ Գագիկ Բարսեղյանի տատիկը՝ տիկին Զինան:
«Ես հունվարի 18-ին իր հետ խոսել եմ, ասեց՝ տատ ջան, լավ ենք, բոլորից հարցրեց, ոնց են:
Էդ երեխեքը մի տան անդամի նման էին: Ես գնացել, տեսել եմ, շատ ուրախ էին: Դրա համար ես չեմ հավատում, որ իրենց ընկերության մեջ կոնֆլիկտներ լիներ: Հիմա եկել ենք, որ հասկանանք, թե էդ ինչ է կատարվել: Հնարավոր չէր հրդեհից լիներ, իմ թոռը չգիտեր քնելն ինչ բան ա: Այրվելու վարկածը հնարավոր չի, վառել են: Հրդեհը սուտ վարկած է, ես հենց սկզբից չեմ հավատացել:
Դեռ ժողովուրդը չգիտեր, վարչապետն արդեն հայտարարում էր, թե պաժառ ա եղել: Դու որտեղի՞ց իմացար: Ուրեմն մի բան եղել է, իրենք գիտեն, չեն ասում»,-ասաց տիկին Զինան:
Ավելի վաղ NEWS.am-ը հայտնել էր, որ հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն:
Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը և ևս 7 բարձրաստիճան զինվորականներ։
Դեպքից ժամեր անց վարչապետ Նիկոլ Փաշինյանը կառավարության նիստում ներկայացրեց պաշտոնական վարկածը, ըստ որի սպան բենզին է լցրել վառարանի վրա, ինչից հետո, երբ կրակն իրեն է անցել, «ինքնապաշտպանական բնազդով» բենզինի 5 լիտրանոց տարան նետել է կացարանի ուղղությամբ, ինչն էլ հրդեհի պատճառ է դարձել։
Ավելի ուշ դասակի հրամանատարը լրագրողներին հայտնել էր, որ կացարանում բենզին չի եղել, ըստ էության, հերքելով վարչապետին: Զինդատախազը ևս հայտարարել էր, որ դեռ պարզ չէ՝ բենզին է եղել, թե դիզվառելիք:
Նշենք, որ հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ)։