Բնականաբար, Թուրքիայի հետ սահմանի բացումը միանշանակ կնպաստի քաղաքի եւ ամբողջ մարզի զարգացմանը։ Այս մասին այսօր՝ փետրվարի 23-ին, լրագրողների հետ զրույցում ասաց Շիրակի մարզպետ Մուշեղ Մուրադյանը։
Նա պարզաբանեց, որ ֆինանսական հոսքերի եւ ներդրումների ավելացումը չի կարող չհանգեցնել զարգացման։ «Չնայած առանց սահմանի բացման մարզում զբոսաշրջության զարգացում է գրանցվել։ Հիմա Գյումրին ծաղկուն քաղաք է։ Ես տեսնում եմ, որ սոցիալական խնդիրներն օր օրի նահանջում են։ Մինչեւ 2027 թվականը քաղաքը պետք է ամբողջությամբ ազատվի «դոմիկներից»»,-նշեց Մուրադյանը։
Անդրադառնալով Անի համայնքում կայանալիք ՏԻՄ ընտրություններին՝ նա վստահեցրեց, որ որեւէ մեկին, այդ թվում՝ իշխող խմբակցության ներկայացուցչին առաջ մղելու որեւէ հանձնարարական չկա։ «Չեմ հասկանում նման խոսակցությունների իմաստը։ Ընտրում են քաղաքացիները, եւ հենց նրանց ձայներն են ազդելու»,-հավելեց մարզպետը։