Բալի կղզում հանգստացող զբոսաշրջիկներին տեղական իշխանություններն արգելել են մոտոցիկլետներ վարձել։ Այս մասին հայտնում է Bloomberg-ը՝ հղում անելով կղզու նահանգապետ Վայան Կոստերին։

Կոստերի խոսքով՝ այսուհետ զբոսաշրջիկները ստիպված կլինեն օգտվել Բալիի զբոսաշրջային բիզնեսի կողմից տրամադրվող տրանսպորտային ծառայություններից՝ «որակյալ եւ արժանապատիվ զբոսաշրջություն երաշխավորելու համար»։

Հնարավոր է, որ չեղարկեն այն զբոսաշրջիկների վիզաները, որոնց ոստիկանությունը կկանգնեցնի մոտոցիկլետ վարելիս։ Bloomberg-ի տվյալներով՝ մոտոցիկլետների վարձույթի արգելքը, հավանաբար, կապված է ռուս եւ ուկրաինացի զբոսաշրջիկների պահվածքի հետ։ 2023 թվականի փետրվարին տեղի իրավապահները ձերբակալել են մի ռուսաստանցու, որը ոչ սթափ վիճակում վարել է մոտոցիկլետ եւ բախվել մեկ այլ վարորդի։ Նաեւ 2023 թվականի հունվարին տեղի ունեցած վթարից մի ռուս եւ մի ուկրաինացի են մահացել։