Հայաստանում արգելում են արտարժույթով հիփոթեքային վարկերի տրամադրումը։ Մարտի 21-ին ԱԺ նիստին «Արժութային կարգավորման եւ արժութային վերահսկողության մասին» օրենքում փոփոխությունների նախագծի երկրորդ եւ վերջնական ընթերցման քննարկման ժամանակ այս մասին ասաց ֆինանսավարկային եւ բյուջետային հարցերի մշտական հանձնաժողովի նախագահ, իշխող «Քաղաքացիական պայմանագիր» խմբակցության պատգամավոր Գեւորգ Պապոյանը։
Ըստ պատգամավորի՝ իշխանությունները, ելնելով ֆինանսական համակարգի կայունության ապահովման անհրաժեշտությունից, ինչպես նաեւ աշխարհում նկատվող տնտեսական, քաղաքական եւ ֆինանսական ռիսկերից, մտադրություն են հայտնել ավելի վճռական պայքարել «դոլարիզացիայի» եւ «արժույթային մտածողության» դեմ:
«Ապագա ռիսկերը մեղմելու համար առաջարկում ենք արգելել արտարժույթով հիփոթեքային վարկերի տրամադրումը։ Այս հարցը քննարկվել է ինչպես Կենտրոնական բանկի, այնպես էլ կառավարության ներկայացուցիչների հետ։ Այս որոշումը քաղաքացիների համար ոչ մի լուրջ խնդիր չպետք է ստեղծի։ Հնարավոր բացասական ազդեցությունը շատ չնչին կլինի»,- վստահեցրեց Պապոյանը։
Վերջին շրջանում, ինչպես նշեց պատգամավորը, եվրոյով եւ դոլարով տրամադրվող վարկերի ծավալը զգալիորեն աճել է։ «Եվ եթե այդ արժույթների փոխարժեքը կտրուկ բարձրանա, ապա վարկառուները լուրջ խնդիրներ կունենան»,- պարզաբանեց պատգամավորը։
Բանկերը, ըստ նրա, ոգեւորված չեն այս նախագծով։ Այնուամենայնիվ, նույնիսկ այնտեղ հասկանում են առկա ռիսկերի չափը:
ՀՀ Կենտրոնական բանկի նախագահի տեղակալ Հովհաննես Խաչատրյանը աջակցեց ծրագրին։ Նրա կարծիքով՝ օրենսդրական նախաձեռնությունը թույլ կտա քաղաքացիներին հետագայում խուսափել դժվարություններից։ «Այս պահին հիփոթեքային վարկ ունի 8000 քաղաքացի։ Սակայն հիփոթեքային բումի ֆոնին այս ցուցանիշը կարող է կրկնապատկվել»,- զգուշացրեց ԿԲ ներկայացուցիչը։