Վաղը տեսչական մարմնից գալու են ստուգեն, մենք էլ մի մարդու պես գալիս ենք գործի, եթե երեք խախտումի համար շուկան փակեցին, մենք էլ փակում ենք էս փողոցները, բոլորս էլ ավտո ունենք: Այս մասին, այսօր՝ մարտի 23-ին, «Սուրմալու» առեւտրի կենտրոնում բողոքի ակցիայի ժամանակ նշեց աշխատակիցներից մեկը:
Նշենք, որ «Սուրմալու»-ի աշխատակիցները պահանջում են բացել կենտրոնը եւ թույլ տալ իրենց աշխատել:
«Սենց չի լինի, երկու կետի որոշման պատճառով 5 հազար հոգի մնացել է օդի մեջ: Թող գան բոլոր տաղավարները բացեն ստուգեն: Ես հատուկ խնդրելու եմ, որ մենք 10 հոգով տեսչական մարմնի աշխատակիցների հետ շրջենք, որ իրենք իրենցից դուրս կետ չդնեն: Չի կարելի 2 կետի համար 5 հազար հոգու սոված թողնել: Թող գան ստուգեն, չեն գալիս»,-ասաց աշխատակիցներից մեկը:
Աշխատակիցներից տիկին Աիդան էլ պատմեց, որ ինքն է ընտանիքը պահում և չգիտի` ինչ է լինելու հետո, քանի որ բավական ապրանք ունի գնած։ Նրա խոսքով` լուրեր կան, որ առևտրի կենտրոնը պետք է փակվի, բայց իրենց ոչ մի բան չեն ասում. «Ես 20 տարի է, ինչ այստեղ եմ աշխատում, 60-ն անց կին եմ։ Եթե այստեղից դուրս գամ, ո՞վ է ինձ աշխատանք տալու, ո՞վ է ընտանիքս պահելու»,– ավելացրեց կինը։
Հիշեցնենք, որ Տեսչական մարմնի որոշմամբ՝ «Սուրմալու» առեւտրի կենտրոնը փակ է մարտի 14-ից։ Այնտեղ հայտնաբերվել են տեխնիկական և հրդեհային անվտանգության նորմատիվ փաստաթղթերի պահանջների բազմաթիվ խախտումներ։ Քաղաքաշինության, տեխնիկական եւ հրդեհային անվտանգության տեսչական մարմնի մամուլի խոսնակ Ելենա Զոհրաբյանը նշել է, որ «Սուրմալու» առեւտրի կենտրոնում հայտնաբերվել է հրդեհային եւ տեխնիկական անվտանգության նորմատիվ պահանջների 51 խախտում։ Նա հավելել է, որ կենտրոնը դեռ չի վերաբացվել, քանի որ խախտումները չեն վերացվել։