Ատոմային Էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսին չորեքշաբթի ժամանել է Զապորոժիեի ԱԷԿ, փոխանցում է ՏԱՍՍ-ը։ Սա Գրոսիի երկրորդ այցն է ԶԱԷՍ, որը գտնվում է Զապորոժիեի մարզի Էներգոդար քաղաքում: ՄԱԳԱՏԷ-ի պատվիրակության կազմում ընդգրկված է 11 մարդ, այդ թվում ՝ Գրոսսին եւ երեք տեսուչներ, որոնք ժամանել են ռոտացիայի համար: Նրանց ուղեկցում է յոթ մարդ՝ ՄԱԿ-ի Անվտանգության եւ աջակցության դեպարտամենտի ներկայացուցիչներ, հաղորդում է ՏԱՍՍ-ը։
Ինչպես հայտնել է «Ռոսէներգոատոմ» կոնցեռնի գլխավոր տնօրենի խորհրդական Ռենատ Կարչաան, Սլովակիայից, Ֆրանսիայից եւ Ճապոնիայից երեք փորձագետներ կայանում կմնան մոտ երկու ամիս: Զապորոժիեի ԱԷԿ այցելելու իր ծրագրերի մասին Գրոսին հայտարարել էր մարտի 25-ին։ Ավելի ուշ Կարչաան ՏԱՍՍ-ին հայտնել է, որ այցը կկայանա մարտի 29-ին, իսկ դրա հետ մեկտեղ տեղի կունենա նաեւ ՄԱԳԱՏԷ-ի տեսուչների հերթական ռոտացիան, որը վերջին անգամ գրեթե մեկ ամսով հետաձգվել էր ՄԱԿ-ի անվտանգության դեպարտամենտի մեղքով: Ինքը՝ Գրոսին, ասել է, որ ցանկանում է անձամբ ստուգել, թե ինչպես է փոխվել իրավիճակը 2022 թվականի սեպտեմբերի 1-ին կայան կատարած իր նախորդ այցից հետո: Մարտի 22-ին Գրոսին հայտարարել է, որ Զապորոժիեի ԱԷԿ-ի շուրջ ապառազմականացված գոտու ստեղծումն արդեն չի դիտարկվում, խոսքը կայանի շրջանում ռազմական գործողությունների դադարեցման մասին է: