Վրաստանի եւ Հայաստանի երկու քաղաքների՝ Ռուսթավիի եւ Իջեւանի քաղաքապետերը բարեկամության հուշագիր են ստորագրել, տեղեկացրել է «Новости-Грузия»-ն։
Փաստաթղթերի տակ ստորագրել են Նինո Լացաբիձեն եւ Արթուր Ճաղարյանը։ Արարողությանը մասնակցելու եւ Վրաստանում բանակցություններ վարելու համար Հայաստանից ներկայացուցչական պատվիրակություն էր ժամանել։
«Մեր քաղաքի նոր զարգացման փուլում կարեւոր է միջազգային կապեր եւ բարեկամություն հաստատել նոր քաղաքների հետ»,- ասել է Ռուսթավիի քաղաքապետ Նինո Լացաբիձեն։
Հուշագիրը վերաբերում է համագործակցությանը եւ փորձի փոխանակմանը տեղական ինքնակառավարման տարբեր հարցերում, ներդրումների ներգրավմանը, պինդ թափոնների հարցի լուծմանը եւ քաղաքային տնտեսության զարգացմանը։
Ռուսթավին Թբիլիսիի արբանյակ-քաղաքն է, մայրաքաղաքից հեռու է ընդամենը 11 կիլոմետր, բնակչությունը՝ մոտ 120 հազար մարդ։
Իջեւանը Հայաստանի Տավուշի մարզի վարչական կենտրոնն է, դրանով է անցնում Երեւան-Թբիլիսի մայրուղին։
Իջեւանը Ռուսթավիի բարեկամ եւ գործընկեր 20-րդ քաղաքն է։ Համագործակցության հուշագրեր են ստորագրվել Ժոդինոյի (Բելառուս), Շվեդիայի ամենահյուսիսային քաղաքի՝ Կիրունի, լեհական Պլոցկի, Լոձի, Գդինյա Պրուշկուվի, Ուկրաինայի միանգամից հինգ քաղաքների՝ Կրիվոյ Ռոգի, Խմելնիցկու, Վիննիցայի, Չերկասիի եւ Իվանո-Ֆրանկովսկի, թուրքական Ինեգյոլի, ադրբեջանական Սումգայիթի հետ։ Բալթիայում այդ քաղաքներն են Ակմյանեն եւ Պանեւիժիսը (Լիտվա) եւ Դաուգավպիլսը (Լատվիա)։ Ռուսթավիի գործընկերներից են Ֆիլիպինների Սանտյագոն եւ Կուայանը, նաեւ Շաոգուան քաղաքը չինական Գուանդուն նահանգում։
