FlyOne Armenia ավիաընկերությունը երեկ Թուրքիայի օդային սահմանով նախատեսված չվերթներ չի ունեցել: Այս մասին NEWS.am-ի հետ զրույցում ասաց ավիաընկերության տնօրենների խորհրդի նախագահ Արամ Անանյանը:
Անանյանը նշեց, որ թուրքական արգելքի հետեւանքով միայն Փարիզ-Երեւան չվերթն էր, որը հարկադրված վայրէջք էր կատարել այլ երկրում:
Հարցին, թե թուրքական կողմն արգելքի համար ի՞նչ պատճառաբանություն է ներկայացնում եւ ինչ աշխատանքներ են տարվում այն վերացնելու համար, Անանյանը նշեց, որ այս պահին նորություն ասել չի կարող:
«Հենց տեղեկություն ստանանք, միանգամից կիրազեկենք: Ավիաընկերությունը կիրառելու է իր տրամադրության տակ եղած ողջ գործիքակազմը, որ իր ուղեւորների ճամփորդական պլանները փոփոխություն չկրեն»,- ասաց Անանյանը:
Ժամը 00:55-ին սպասվում է Երեւան-Ստամբուլը չվերթը, որը չեղարկված չէ:
«Թուրքական կողմը միայն արգելում է իր օդային տարածքով այլ երկրներ թռչելը, դեպի Ստամբուլ չվերթները չեղարկված չեն: Առաջիկա օրերին սպասվող չվերթները դեռ չեն հետաձգվել, համագործակցում ենք մեր եվրոպացի գործընկերների հետ չվերթներն իրականացնելու համար, այս պահին էլ տեղի է ունենում Լիոն-Երեւան չվերթը»,- ասաց Անանյանը:
Հիշեցնենք, որ Թուրքիայի ավիացիոն իշխանություններն առանց նախօրոք տեղեկացնելու ապրիլի 29-ին չեղարկել են Flyone Armenia ավիաընկերությանը նախօրոք տրամադրված թույլտվությունը Թուրքիայի օդային տարածքով դեպի Եվրոպա չվերթեր իրականացնելու համար։
Թուրքիան փակել է իր օդային տարածքը հայկական FlyOne Armenia ավիաընկերության համար
