Իտալիայի պետական պարտքի չափը մարտին փետրվարի համեմատ աճել է 17,8 մլրդ եվրոյով եւ հասել պատմական առավելագույնին` 2,79 տրլն եվրոյի, հետեւում է տեղական կենտրոնական բանկի վիճակագրությունից:
«Նոր պատմական ռեկորդ։ Այս էքսպոտենցիալ աճը մտահոգիչ եւ տագնապալի է՝ հաշվի առնելով տոկոսադրույքների աճը, որը կապված է Եվրոպական կենտրոնական բանկի նոր սահմանափակող դրամավարկային քաղաքականության հետ», - AgenPress-ը մեջբերում է Իտալիայի սպառողների ազգային միության նախագահ Մասիմիլիանո Դոնայի խոսքը:
Այնուամենայնիվ, Եվրահանձնաժողովը (ԵՄ գործադիր մարմինը) մայիսյան տնտեսական կանխատեսման մեջ կանխատեսել էր Իտալիայի պետական պարտքի կրճատում՝ ՀՆԱ-ի նկատմամբ։ 2022 թվականի արդյունքներով սուվերեն պարտքը կազմել է ՀՆԱ-ի 144,4 տոկոսը, իսկ 2023 թվականին այն կնվազի մինչեւ 140,4 տոկոս, կարծում է ԵՀ-ն։ Թեեւ պետական պարտքի նվազումը կշարունակվի, սակայն դրա տեմպերը կդանդաղեն, կարծում են վերլուծաբանները։
ԵՀ-ն նաեւ 0,3 տոկոսով բարելավել է Իտալիայի ՀՆԱ-ի այս տարվա աճի իր կանխատեսումը՝ մինչեւ 1,2 տոկոս։ Հանձնաժողովը նաեւ ակնկալում է, որ երկրի բյուջեի դեֆիցիտը կնվազի մինչեւ ՀՆԱ-ի 4,5 տոկոսը՝ բնակչության աջակցության միջոցներից մասնակիորեն հրաժարվելու հաշվին, որոնք կիրառվել էին էներգակիրների գների վերջին աճի ժամանակ, ինչպես նաեւ կորոնավիրուսի սահմանափակումները ամբողջությամբ փուլ առ փուլ վերացնելու միջոցով: