Ուկրաինայի նախագահ Վլադիմիր Զելենսկին երկուշաբթի հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ, որը նախօրեին հաղթել էր ընտրություններում, տեղեկացրել է «Европейская правда»-ն՝ հղում կատարելով երկու երկրների նախագահների մամուլի ծառայություններին։
Ինչպես գրել է Զելենսկին Թվիթերում, հեռախոսազրույցի ժամանակ նա նշել է Էրդողանի անձնական դերը ցորենի Սեւծովյան նախաձեռնության շարունակման գործում, «ինչը համաշխարհային պարենային անվտանգության ծանրակշիռ բաղադրիչն է»։
«Ուկրաինայի եւ Թուրքիայի համագործակցությունը կարեւոր է եւ նպաստում է մեր ժողովուրդների բարեկեցությանն ու միջազգային կայունությանը։ Հետագայում եւս կզարգացնենք այն եւ համատեղ կաշխատենք տարածաշրջանի, Եվրոպայի եւ աշխարհի անվտանգության ամրապնդման համար»,- ավելացրել է նա։
Թուրքիայի նախագահի գրասենյակի կարճ հաղորդագրությունում նշվել է, որ Զելենսկին շնորհավորել է Էրդողանին ընտրություններում տարած հաղթանակի համար, ինչպես նաեւ քննարկել է «իրադարձությունները ռուս-ուկրաինական պատերազմում եւ տարածաշրջանային հարցեր»։
