Մենք կարևորում ենք մեր եղբայրական հարաբերությունները, դրանք կրում են ռազմավարական, դաշնակցային բնույթ։ Այս մասին այսօր՝ հունիսի 7-ին, ՀՀ վարչապետ Նիկոլ Փաշինյանի հետ հանդիպման ժամանակ ասել է ՌԴ վարչապետ Միխայիլ Միշուստինը։

«Այսօր Ռուսաստանի և Հայաստանի միջև առևտրատնտեսական, ներդրումային համագործակցությունը զարգանում է ակտիվ, դինամիկ՝ չնայած մի շարք անբարյացակամ պետությունների կողմից ընդունված անօրինական տնտեսական պատժամիջոցներին։

Հունվար-ապրիլին փոխադարձ առևտուրն աճել է 96%-ով և կազմել գրեթե 140 մլրդ ռուբլի կամ ավելի քան 666 մլրդ դրամ։

Կարևոր է պահպանել այս դրական թափը և հասնել փոխադարձ առևտրի նոր ռեկորդային մակարդակների։

Հայաստանում հաջողությամբ գործում են ռուսական կապիտալով ավելի քան 4500 ընկերություններ։ Կուտակված ներդրումներն այսօր գերազանցում են Հայաստանի տնտեսությունում բոլոր օտարերկրյա ներդրումների ընդհանուր ծավալի 46%-ը։

Մենք շահագրգռված ենք նոր համատեղ նախագծեր սկսել էներգետիկայի, հանքարդյունաբերության, թվայնացման և ագրոարդյունաբերության ոլորտներում։

Ռուսական ընկերությունները պատրաստ են առաջարկել առաջադեմ լուծումներ, այդ թվում՝ էլեկտրոնային կառավարման, խելացի և անվտանգ քաղաքների և տրանսպորտային ենթակառուցվածքների ոլորտներում։ Կան մի շարք նախագծեր։

Մենք ավելի քիչ ուշադրություն ենք դարձնում Հայաստանի հետ տարածաշրջանային համագործակցությանը։

Այժմ աշխատում է Ռուսաստանի Դաշնության շուրջ 70 սուբյեկտ, ուղիղ կապեր են հաստատվել Ռուսաստանի մարզերի և հայկական սուբյեկտների միջև»,-ասել է Միշուստինը:

Նրա խոսքով, անցյալ տարի ՌԴ մարզերի ներկայացուցիչների մասնակցությամբ Հայաստանում կազմակերպվել է 24 բիզնես առաքելություն. «Կարևոր է ընդլայնել նման շփումները և ստեղծել նոր համագործակցային կապեր։

Ռուսաստանը և Հայաստանը արդյունավետ համագործակցում են ԵԱՏՄ-ում և ԱՊՀ-ում. Վստահ եմ, որ որոշումները, որոնք մենք ընդունում ենք այստեղ՝ Սոչիում, նոր խթան կհաղորդեն, այդ թվում՝ այս տարածքում տնտեսական ինտեգրացիայի զարգացմանը»,- հավելել է Միշուստինը։