Ռուսաստանի Քննչական կոմիտեն հայտնել է, որ գործակալությունը հետաքննում է քրեական գործ՝ Սամարայի մարզի ՆԳՆ գլխավոր վարչության պահեստից 6 տոննա մեթիլ սպիրտ հափշտակելու փաստով։ Այն օգտագործվել է «Միստր սիդր» վտանգավոր փոխնակ ալկոհոլային ըմպելիքի պատրաստման համար։ Քննիչները պահանջում են կալանավորել գործով մեղադրյալներին, գրում է «Կոմերսանտը»։
«Պարզվել է, որ 2023 թվականի մայիսին Դմիտրի Եգորովը եւ նրա հայրը՝ Ալեքսեյ Եգորովը, ոստիկան Իվան Գրեբենկինի հետ միասին Սամարայի մարզի ՆԳՆ գլխավոր վարչության պահեստից 6 տոննա մեթիլ սպիրտ են հափշտակել եւ այն վաճառել Արտյոմ Հայրապետյանին, որը սպիրտի անօրինական մատակարարումներ է իրականացրել Հուսեյնովին։ Արդյունքում թունավոր նյութն օգտագործվել է ալկոհոլ պարունակող ըմպելիքի արտադրության մեջ, որը մատակարարվել է Ռուսաստանի մի շարք շրջաններ»,- նշվում է հաղորդագրության մեջ։
Արտյոմ Հայրապետյանին, Իվան Գրեբենկինին, Դմիտրի Եգորովին ուժայինները բերման են ենթարկել, նրանց մեղադրանք է առաջադրվել, քննիչները մտադիր են միջնորդել նրանց կալանավորելու համար։ Ալեքսեյ Եգորովի նկատմամբ դաշնային հետախուզում է հայտարարվել։ Այս քրեական գործի ֆոնին ՆԳ նախարար Վլադիմիր Կոլոկոլցեւը աշխատանքից ազատել է Յուրի Սաֆրոնովին՝ Սամարայի մարզի ՆԳՆ գլխավոր վարչության պետի տեղակալին, որը վերահսկում էր թիկունքի ստորաբաժանումների գործունեությունը։
Հունիսի 5-ից գրանցվել է զանգվածային թունավորում «Միստր Սիդր» ըմպելիքով, որը արտադրվել է Սամարայի «Անդի» ՍՊԸ կողմից «Վարկա» մասնավոր գարեջրի գործարանում։ ՌԴ առողջապահության նախարարության տվյալներով՝ ալկոհոլային թունավորման հետեւանքով մահացել է 31, տուժել 101 մարդ։ Սիդրն առգրավվել է Ռուսաստանի 11 մարզերում։
