Հիգիենայի եւ առողջության համար ապրանքներ արտադրող շվեդական Essity ընկերությունը կդադարեցնի գործունեությունը Ռուսաստանում։ Ակտիվները ռուս գնորդին վաճառելու գործարքը հավանության է արժանացել կառավարության կողմից, այն կավարտվի մինչեւ երկրորդ եռամսյակի ավարտը: Այս մասին հայտնել է ընկերության մամուլի ծառայությունը, փոխանցում է РБК-ն։

Essity-ն սկսել է լքել ռուսական շուկան անցյալ ապրիլին, 2022 թվականի համար ընկերությունը դուրս է գրել ռուսական ակտիվները մոտ 1,7 միլիարդ շվեդական կրոնի չափով (6,8 միլիարդ ռուբլի)։ Նույն թվականին Ռուսաստանում ընկերության զուտ շահույթը կազմել է ընդհանուր վաճառքի մոտ 2 տոկոսը։

Essity-ի արտադրած ապրանքներից են Libero մանկական տակդիրները, Libresse կանացի հիգիենայի միջոցները, TENA անմիզապահության պաշտպանության արտադրանքը, զուգարանի թուղթը, թղթե սրբիչները, թաշկինակները եւ Tork անձեռոցիկները, ինչպես նաեւ ձեռքերի հակասեպտիկ գելերն ու օճառը:

Ռուսաստանում ընկերությունը գործում է 1994 թվականից, որտեղ Essity-ն ունի երեք գործարան՝ մեկը Լենինգրադի մարզի Սվետոգորսկ քաղաքում, եւս երկուսը՝ Սովետսկում եւ Տուլայի մարզի Վենեւում։ Նրանց համար աշխատում է մոտ 1,3 հազար մարդ։