Երկրի հանքային պաշարները մի օր կսպառվեն, և մարդկությունն անխուսափելիորեն դրանց հետևից տիեզերք կգնա։ ՆԱՍԱ-ում դրան ակտիվորեն պատրաստվում են արդեն հիմա․ մի քանի անգամ հետաձգված «Psyсhe» («Փսիխեա») առաքելությունը դեպի մետաղներով հարուստ Փսիխեա աստղակերպ մեկնարկում է արդեն այս տարվա հոկտեմբերին, տեղեկացնում է «Տեխկուլտը»։

Թռիչքը տևելու է 5 տարի, 10 ամիս։ Առաքելության նպատակն ավելի քան 220 կմ տրամագծով աստղակերպի ուսումնասիրությունն է։ Այն կընթանա առնվազն 26 ամիս։ Այդ ընթացքում տիեզերական զոնդը կհետազոտի երկնային մարմնի քիմիական կազմը, ձգողականության ուժը, խտությունը և կառուցվածքը։ Փսիխեայի առանձնահատկությունն այն է, որ աստղակերպը կազմված է հիմնականում երկաթից և նիկելից։ «Երկրային» գներով փորձագետները նրա արժողությունը գնահատում են 10 կվադրիլիոն դոլար, ինչը գերազանցում է ներկայիս երկրային ողջ տնտեսության արժողությունը (110 տրլն դոլար) 90 անգամ։

Գիտնականների կարծիքով, Երկրին մոտ հանքային պաշարների անհատակ պահեստը Մարսի և Յուպիտերի միջև գտնվող աստղակերպերի գոտին է, որ բաղկացած է մեր Արեգակնային համակարգի «շինարարական նյութից»։ Եթե այդ «գործը գլուխ բերվի», ապա Երկրի յուրաքանչյուր բնակչին բաժին կհասնի 100 մլրդ դոլարի հանքային պաշարներ։

Առայժմ պարզ չէ, ինչպես այդ անհամար հարստությունը հասցնել մեր մոլորակ, սակայն արդեն ստեղծվել են մի քանի ընկերություններ, որոնք աստղակերպերի առևտրական մշակման հնարավորություններ են որոնում։ «Փսիխեա» առաքելության արդյունքներն, անկասկած, կօգնեն առաջ գնալ այս ուղղությամբ։