Երեւանի նախկին քաղաքապետ Հայկ Մարությանն այսօր՝ օգոստոսի 8-ին, հայտարարեց, որ մասնակցելու է սեպտեմբերի 17-ին սպասվող ավագանու ընտրություններին։ Նա գլխավորելու է «Ազգային առաջընթաց» կուսակցությունը։

«Հայտարարում եմ՝ իմ թիմի հետ մասնակցելու եմ ավագանու առաջիկա ընտրություններին։ Մեր թիմը չունի մեծ գումարներ, լրատվամիջոցներ, օլիգարխներ, մեր միակ հարստությունը, դուք եք, երեւանցիներ։ Միակ որոշողը դուք եք։ Մենք միասին ամեն ինչ կարող ենք»,- նշեց Մարությանը։

Թեպետ փաստաթղթերը եւ նախընտրական ցուցակը ներկայացնելու վերջնաժամկետը օգոստոսի 13-ն է, սակայն մամուլում կան տեղեկություններ Մարությանի հնարավոր թիմակիցների մասին։

Մարությանի թիմում ընդգրկված լինելու մասին իր ֆեյսբուքյան էջում առաջինը հայտարարել է Երեւանի ավագանու անդամ Իզաբելլա Աբգարյանը։

Մամուլում տեղեկություններ կան, որ ցուցակում ընդգրկված են նաեւ ավագանու անդամ Էռնեստ Ավանեսովը եւ «Կանաչապատում և շրջակա միջավայրի պահպանություն» ՀՈԱԿ-ի նախկին փոխտնօրեն Քրիստինա Վարդանյանը։

NEWS.am-ի հետ զրույցում Ավանեսովը ոչ հերքեց, ոչ էլ հաստատեց տեղեկությունը՝ նշելով, որ այն կմեկնաբանի մի քանի օրից։

Իսկ Քրիստինա Վարդանյանի հետ կապվել մեզ չհաջողվեց։

Հիշեցնենք, որ նրանց բոլորի հետ Մարությանն աշխատել է քաղաքապետ եղած տարիներին։ Իշխող ուժի եւ Հայկ Մարությանի միջեւ կապը խզվել էր պատերազմից հետո։ 2021 թվականի դեկտեմբերի 22-ին ավագանու «Իմ քայլը» խմբակցությունն անվստահություն հայտնեց Մարությանին՝ նրան հեռացնելով քաղաքապետի պաշտոնից։