Առաջիկա ժամերի ընթացքում հրաժարական են տալու և Արցախի նախագահ Արայիկ Հարությունյանը, և պետնախարար Գուրգեն Ներսիսյանը, հաղորդում է «Հրապարակը»:
Ըստ կայքի տեղեկությունների՝ Արայիկ Հարույունյանը հրաժարական տալուց առաջ աշխատանքից կազատի Արցախի պետնախարար Գուրգեն Ներսիսյանին։
Ըստ այդմ, երկրի ղեկավարումը կանցնի Անվտանգության խորհրդի քարտուղար Սամվել Շահրամանյանին։ Ըստ ամենայնի՝ նա էլ կլինի նախագահի պաշտոնի թեկնածուն, որին պետք է ընտրի Ազգային ժողովը։
ԱՀ նախագահ Արայիկ Հարությունյանի հրաժարականի մասին լուրերը Արցախի նախագահականից ո՛չ հերքում են, ո՛չ հաստատում. «Այս պահին չեմ կարող այդ տեղեկությունը մեկնաբանել, սպասենք պաշտոնական հաղորդագրությանը»,- ասել է Հարությունյանի խորհրդական Վլադիմիր Գրիգորյանը։
Հիշեցնենք, որ տելեգրամյան ալիքները, այդ թվում Բաղրամյան 26-ը, տեղեկություն էին հայտնել, որի համաձայն Արայիկ Հարությունյանն այսօր հրաժարական կտա։ Ավելի վաղ ևս տեղեկություններին էին շրջանառվում Հարությունյանի հրաժարականի մասին, որոնք հերքվեցին։
Սակայն, օրեր առաջ Արայիկ Հարությունյանը ԱԺ-ում ավելի քան 6 ժամ տևած խորհրդակցությունից հետո Վերածննդի հրապարակում հավաքված արցախցիներին ներկայացրել էր քննարկման արդյունքները։
Նա տեղեկացրել էր, որ քննարկվել է նաև նախագահի պաշտոնում իր մնալ-չմնալու հարցը։ «Վաղը, մյուս օրը ավելի նեղ կազմով կորոշենք, եթե պետք լինի, որ ես հրաժարական տամ»,-ասել է Հարությունյանը։