Չժիցզինդուն քարայրը, որը նախկինում կոչվում էր Դացզիդուն, ստալագմիտների եւ քարե սյուների կախարդական քարայր-գանձարան է։
Եթե ուզում եք ձեզ «Մատանիների տիրակալը» ֆիլմի եւ նման կինոնկարների հերոս զգալ, ապա պետք է անպայման այցելեք այս քարայր, որը գտնվում է չինական Գույչժոու նահանգում։ Քարայր մուտքն արժե 160 յուան (մոտ 22 դոլար)։
Չժիցզինդուն գեոպարկը գտնվում է Գույչժոուի բարձրավանդակի արեւմտյան մասում, Չինաստանի հարավում։ Այն գոյացել է երկրաբանական լանդշաֆտի երեք տարրերից՝ Չժիցզինդուն քարայրներից, Չիժեխե գետից եւ Դոնգֆենհու լճից։
Չժիցզինդուն քարայրով անցնում է միամուտք զբոսաշրջային երթուղին, ուստի քարայր մտնելով՝ պետք է անցնել ամբողջ ճանապարհը, քարայրից դուրս գալուց հետո զբոսաշրջիկները էլեկտրամեքենայով վերադառնում են մուտքի մոտ։
Բնության այս հրաշք քարայրում գտնվելու ամբողջ ժամանակի ընթացքում ձեզ կշրջապատեն քարե սալերը, որոնցից դանդաղ ջուր է հոսում, կաթիլների ձայնը լսվում է ամենուր, դրանք ստեղծում են երաժշտական նվագակցություն, ձեր եռաժամ զբոսանքին հաղորդում հոգեկան հանգիստ եւ ստեղծում հոլիվուդյան ֆենթեզի ֆիլմերի մթնոլորտ ստորգետնյա աշխարհի բնակիչների մասին։
Ի դեպ, արժե նշել, որ չինացիներին իրենց գործնականությամբ այստեղ էլ են աչքի ընկել։ Բացի նրանից, որ քարայրում մշտապես աշխատողներ կան, որոնք հետեւում են մաքրությանը, կարգուկանոնին եւ անվտանգությանը, ձեր ճանապարհն առավելագույն չափով հուսալի է դարձված այս բոլոր վտանգավոր ու գեղեցիկ տեսարժան վայրերով անցնելու համար։ Ասենք՝ չեն մոռացվել անգամ զուգարանները, որոնք դրված են ձեր ճանապարհին եւ երկու անգամ կհանդիպեն ձեզ։
Չժիցզինդուն քարայրը համարվում է Չինաստանի ամենագեղեցիկ քարայրը։ Այն ներառված է ՅՈւՆԵՍԿՕ-ի գեոպարկերի գլոբալ ցանցում։ Ավելացնեմ, որ Չժիցզինդունը պետական նշանակության գեղատեսիլ շրջան է եւ պետական նշանակության երկրաբանական այգի։
Գույչժոուից՝ Պարույր Սինյավսկի
