Թեհրանում ամերիկյան դեսպանատան վրա կատարված հարձակման 30-ամյակի կապակցությամբ այսօր՝ նոյեմբերի 4-ին բարձր պատրաստվածության են բերվել Իրանի անվտանգության ուժերը:
Այն շենքի մոտ, որտեղ 1979թ. տեղակայված էր ԱՄՆ դեսպանատունը, եւ որը տեղացիներն անվանում են «լրտեսների որջ», հավաքվել են հազարավոր ցուցարարներ, որոնք հակաամերիկյան կարգախոսներ են վանկարկում, հաղոդրում է Irna գործակալությունը:
Միեւնույն ժամանակ ընդդիմության կողմնակիցները, օգտվելով իրավիճակից, դուրս են եկել փողոց՝ հերթական անգամ իրենց բողոքը հայտնելու նախագահ Մահմուդ Ահմադինեջադի իշխանության դեմ: Ելույթով հանդես է եկել իսլամական հեղափոխության առաջնորդներից մեկը, հետագայում ընդդիմադիր դարձած այաթոլլա Մոնթազերին: Նա ամերիկյան դեսպանատան գրավումը մեծ սխալ է համարել:
Ինչպես հաղոդրում է BBC-ն, Իրանի մայրաքաղաքում արդեն առաջին բախումներն են տեղի ունեցել ընդդիմության կողմնակիցների եւ ոստիկանության աշխատակիցների միջեւ: Միջադեպը տեղի է ունեցել մայրաքաղաքի համալսարաններից մեկի մերձակայքում: Բողոքի զանգվածային գործողության անցկացման ժամանակ իրանական ընդդիմության առաջնորդ Միր Հոսեյն Մուսավիի կողմնակիցները բախվել են ոստիկանության հետ:
Ցուցարարներին ցրելու համար ոստիկանությունն արցունքաբեր գազ եւ ռետինե մահակներ է օգտագործել: Reuters գործակալությունը հաղորդում է մի շարք ընդդիմադիրների ձերբակալման մասին: