Ես ոչ մի ժամանակ Արցախի էջը փակված չեմ համարում: Այս մասին այսօր՝ նոյեմբերի 29-ին, 44-օրյ պատերազմի հանգամանքներն ուսումնասիրող ԱԺ քննիչ հանձնաժողովում փակ հանդիպումից հետո լրագրողների հետ զրույցում ասաց Լեռնային Ղարաբաղի Անվտանգության խորհրդի նախկին քարտուղար, պաշտպանության նախկին նախարար Սամվել Բաբայանը:

Հարցին՝ ո՞վ հանձնեց Արցախը, Սամվել Բաբայանը նախ կարճ ասաց՝ ես, ապա շարունակեց. «Արցախը սեպտեմբերի 19-ի դեպքերով հանձնել է Արցախի իշխանությունը»:

Հարցին՝ Նիկոլ Փաշինյանը չի՞ նպաստել Արցախի հանձնմանը՝ նա արձագանքեց. «Նպաստեց։ Ես ասել եմ, որ ֆինասնավորել, այն ձևով անել, ինչ ձև անում է Նիկոլ Փաշինյանն Արցախում, ճիշտ չեմ համարում»։

Դիտարկմնը, որ ՀՀ իշխանությունը կողիքց հետեւում էր, թե ինչ է կատարվում Արցախում եւ ինչպես է հայաթափվում Արցախը, Սամվել Բաբայանն ասաց. « ՀՀ իշխանությունը ոչ մի բան չէր կարող անել, որովհետեւ չունի բանակ, չունի իր պաշտպանությունը, եւ Ադրբեջանն էլ կոշտ հարցը դնում է, որ դու չես կարող դու իմ ներքին հարցերին խառնվել: Հայաստանի իշխանությունը խնդրում էր Արցախի իշխանություններին, որ նստեն ուղիղ բանակցությունների: Նրանք էլ դա բոյկոտում էին, որովհետեւ Մոսկվայից նման կարգադրություն էին ստացել»:

Նա համաձայն չէ այն պնդման հետ, որ ՀՀ իշխանությունն է Արցախը ճանաչել Ադրեջանի մաս։

«Բայց ինչո՞ւ է ձեզ թվում, որ Հայաստանի իշխանությունն է ճանաչել Ղարաբաղն Ադրբեջանի մաս։ Նիկոլ Փաշինյանն ու Արայիկ Հարությունյանը բանակցություններում, որ համաձայնել են փաստաթուղթ ստորագրել, այդ րոպեին էլ ճանաչել են Ղարաբաղն Ադրբեջանի մաս, այսինքն՝ Ղարաբաղի ղեկավարությունը Հայաստանի ղեկավարության հետ նոյեմբերի 9-ին համաձայնել է փաստաթղթին, որտեղ Ղարաբաղն Ադրբեջանի մաս է: Բոլոր նրանք, որոնք համաձայն են եղել նոյեմբերի 9-ի փաստաթուղթը ստորագրելու, քաղաքական բոլոր այդ ուժերը կրում են պատասխանատվություն», - ասաց Արցախի ԱԽ նախկին քարտուղարը։