Իրանի ադյունաբերության, հանքերի եւ առեւտրի՝ տրանսպորտի գծով փոխնախարար Մանուչեհր Մանթեկին ԻՐՆԱ-ի հարցազրույցում հայտնել է, որ իրանական վեց ավտոարտադրողներ ռազմավարական գործընկերության 25-ամյա պլանի շրջանակում Չինաստանի հետ համատեղ կարտադրեն էլեկտրական մեքենաներ։
Մանթեկին տեղեկացրել է, որ իրանական վեց ավտոարտադրողները, ներառյալ երկու խոշոր՝ SAIPA Automotive Group եւ Iran Khodro Industrial Group (IKCO) ընկերությունները, պայմանագիր են կնքել չինական ընկերությունների հետ համատեղ էլեկտրամեքենաներ արտադրելու վերաբերյալ։
Չինաստանը ներկայում համարվում է աշխարհի առաջատար երկիրը էլեկտրական մեքենաների ատադրության գործում, ասել է նա՝ ավելացնելով, որ տարբեր երկրներ շահագրգռված են Չինաստանի հետ համագործակցությամբ իրենց մեքենաներն էլեկտրական դարձնելու եւ ասիական այդ երկրի հետ տեխնոլոգիական պայմանագրեր կնքելու համար։
Իրանի արդյունաբերության նախարարությունը կազմել է էլեկտրական մեքենաների արդյունաբերության մրցունակության բարձրացման համալիր ծրագիր, ասել է նա՝ ավելացնելով, որ առաջին փուլում ուշադրության է առնվել էլեկտրական մեքենաների եւ դրանց առավելությունների ճիշտ օգտագործումը վառելիքի սպառումը նվազեցնելու եւ օդի աղտոտվածության հետ կապված իրավիճակը բարելավելու ուղղությամբ։