Չինաստանի իշխանությունները ևս մեկ անգամ ծրագրում են խստացնել անչափահասների համար առցանց խաղերի կանոնակարգերը՝ արգելելով նրանց գրանցվել այն խաղերում, որոնք «հեշտությամբ կախվածություն են առաջացնում»: Այս մասին ասված է առցանց խաղերի վերահսկման կանոնների նախագծում, որը հրապարակվել է ՉԺՀ-ի մամուլի պետական վարչության կայքում։
«Համակարգչային խաղերի հրատարակիչները պետք է խստորեն վերահսկեն, թե երբ և որքան ժամանակ են անչափահասները խաղում առցանց խաղեր, և անչափահասներին պետք է արգելել խաղալ այնպիսի խաղեր, որոնք հեշտությամբ կախվածություն են առաջացնում և պարունակում են անչափահասների համար անհարիր բովանդակություն», - ասվում է փաստաթղթում:
Գործակալությունն առաջարկում է առցանց խաղերում օգտատերերի ծախսերի սահմանափակում մտցնել և արգելել պարգևներ՝ խաղի ամենօրյա մուտքի համար։ Իշխանությունները նաև քննարկում են խոշոր թեյավճարների արգելումը որպես պարգև՝ գեյմերների համար, ովքեր ուղիղ հեռարձակում են իրենց խաղերը:
Օգոստոսին Չինաստանի կիբերտարածության վարչությունը ներկայացրել է անչափահասների համար բջջային սարքերի և ինտերնետի օգտագործման նոր կանոնների նախագիծ: Փաստաթղթի համաձայն՝ մինչև 8 տարեկան երեխաներին թույլատրվում է սմարթֆոններով աշխատել օրական 40 րոպեից ոչ ավելի, 8-ից 15 տարեկան երեխաներին՝ օրական մեկ ժամից ոչ ավելի, իսկ 16-ից 17 տարեկան դեռահասներին՝ օրական երկու ժամից ոչ ավել: Ավելին, ամեն կես ժամը մեկ սարքը պետք է օգտագործողին հիշեցնի ընդմիջման մասին։
