2022-ի վերջին ԱԺ-ն հաստատեց կրթության զարգացման մինչև 2030-ի պետական ծրագիրը, դրանից հետո հաստատեցինք գործողությունների ծրագիրը: Այս մասին այսօր՝ դեկտեմբերի 27-ին, տարեվերջյան մամուլի ասուլիսում նշեց ԿԳՄՍ նախարար Ժաննա Անդրեասյանը:
«Մշակույթի եւ սպորտի ոլորտում ունենք հաստատված ռազմավարություններ: Գիտության ռազմավարության մշակման աշխատանքները կամբողջացվեն 2024-ին:
Մասնագիտական կրթության եւ ուսուցման նոր օրենքը հեղափոխական նշանակություն է ունենալու ոլորտի որակական փոփոխության համար, հատկապես աշխատանքի վրա հիմնված ուսուցումը դարձնելու ինստիտուցիոնալ մոտեցում եւ նաեւ կրթության որակը քոլեջներում շեշտակիորեն բարձրացնելու ուղղությամբ»,-ասաց նա:
Անդրադառնալով ակադեմիական քաղաք նախագծին, Ժաննա Անդրեասյանն ասաց, որ Ակադեմիական քաղաք հայեցակարգ հաստատվել է:
«Պայմանագրերը կնքված են, մենք հիմա մշակում ենք ակադեմիական քաղաքի գլխավոր հատակագիծը, որը պատրաստ կլինի 2024-ի սկզբին: Նաեւ բովանդակային աշխատանքներն են տարվում բուհերի խոշորացման եւ գիտահետազոտական կազմակերպությունների միավորման ուղղությամբ:
Մինչեւ փետրվարի 15-ը ընդունում ենք հայեցակարգային առաջարկներ, մենք ինքներս աշխատում ենք այս ուղղություններով: Ունենք միջազգային եւ հեղինակություն ունեցող գործընկերներ յուրաքանչյուր կլաստերի ուղղությամբ»,- ընդգծեց նախարարը:
