Վերջին գործողություններն ուղղված էին ահաբեկչական սպառնալիքի չեզոքացմանը։ Այս մասին Պակիստանի արտգործնախարարի հետ ունեցած հեռախոսազրույցում հայտարարել է Իրանի արտգործնախարար Հոսեին Ամիր Աբդոլլահիանը՝ անդրադառնալով «Ջեյշ ալ Զուլմ» խմբավորման դեմ վերջերս իրականացված հակաահաբեկչական գործողությանը, որը ստանձնել է բազմաթիվ ահաբեկչական գործողությունների պատասխանատվությունը։
Աբդոլլահիանի խոսքով՝ առկա տվյալները վկայում էին այն մասին, որ ավելի քան 50 ահաբեկիչ պատրաստվում էր ահաբեկչություն իրականացնել Իրանի դեմ, ինչը կանխվել է։
Իրանի ԱԳ նախարարը հավելել է, որ Իրանը հարգում է Պակիստանի ինքնիշխանությունն ու տարածքային ամբողջականությունը։
Պակիստանի արտգործնախարարությունը հաղորդել էր, որ նախարարները պայմանավորվել են թուլացնել երկկողմ հարաբերություններում ի հայտ եկած լարվածությունն ու քննարկել երկու դեսպանների՝ միմյանց մայրաքաղաքներ վերադառնալու հարցը։