Օրվա իշխանությունները ամբողջովին ձեւափոխում են մեր բանակը: Այս մասին NEWS.am-ի հետ զրույցում նշեց ռազմական փորձագետ Հայկ Նահապետյանը՝ անդրադառնալով նրան, որ այսօր ՊՆ-ն հայտարարել է, որ հայկական բանակի համար նախատեսված նոր համազգեստը հաշվի է առնելու ՆԱՏՕ-ի չափորոշիչները:
«Սա միայն համազգեստին չի վերաբերում: Օրինակ, ուսումնական կենտրոններում, լինի զորամասեր, լինի Վազգեն Սարգսյանի անվան ռազմական ինստիտուտը, չափորոշիչները ՆԱՏՕ-ին են, մարտավարությունը, հրահանգիչները, զորավարժությունները ՆԱՏՕ-ին են: Ինչո՞ւ է սա արվում:
Այսօր ՆԱՏՕ-ի անդամ երկրները եւ նրանց դաշնակիցները, շուրջ 60 երկիր, այսօր պատերազմում են Ռուսաստանի դեմ եւ պարտվում են: Հիմա մենք վերցնում ենք պարտվող ռազմաքաղաքական դաշինքի անդամակցելու ուղին: Համազգեստը այդ տարրերից մեկն է: Ֆրանսիայից գնվում է ՆԱՏՕ-կան զինտեխնիկա: Ես կարծում եմ այս որոշումը ՀՀ իշխանություններինը չէ, իրենք ուղղակի կատարող օղակն են: Որոշումը Արեւմուտքինն է, Հարավային Կովկասում պետք է ստեղծվի Կովկասյան միացյալ բանակ»,-ասաց նա:
Հայկ Նախապետյանի խոսքով, Արեւմուտքը չի համակերպվում Ուկրաինայում պարտության հետ, դրա համար երկրորդ ճակատ պետք է բացել եւ Ռուսաստանը հարավային ուղղությամբ պետք է հարված ստանա Հարավային Կովկասի երեք հանրապետությունների միացյալ բանակից, որոնք պետք է գլխավորեն Թուրքիայի գլխավոր շտաբի սպաները. «Դրա համար է հայկական բանակը բերվում ՆԱՏՕ-ի ստանդարտներին: Ես չգիտեմ՝ դա որքանով կստացվի, բայց Հայաստանը դրանից կորուստներ է ունենալու, այնպես, ինչպես Ուկրաինան, դրանից առաջ Վրաստանը»: