Անկախ թեկնածու Բորիս Նադեժդինը ՌԴ նախագահի ընտրություններում թեկնածու առաջադրվելու համար հավաքել է ընտրողների 150 հազար ստորագրություն։ Այս տեղեկությունը հրապարակվել է նրա կայքում։

Լուրի հրապարակման պահին, դատելով հաշվեցույցից, Նադեժդինի առաջադրմանն աջակցել է 158 06 մարդ։ Ստորագրահավաքը շարունակվում է։

Նախագահի պաշտոնին առաջադրվելու համար անհրաժեշտ է հավաքել ստորագրություններ ՌԴ մարզերի կեսից ավելիում, մեկ մարզից ստորագրությունների թիվը չպետք է գերազանցի 2 500-ը։

Նադեժդինի թիմում հայտարարել են, որ նախատեսում են ԿԸՀ հանձնել 2 500-ական ստորագրություններ 40 մարզերից։ Հաշվեցույցի տվյալներով՝ անհրաժեշտ քանակությունը հավաքվել է ավելի քան 20 մարզերում։

Բորիս Նադեժդինը ընտրություններին մասնակցում է «Քաղաքացիական նախաձեռնություն» կուսակցությունից։ Իր առաջադրման մասին քաղաքական գործիչը հայտարարել է 2023թ. վերջին։

ԿԸՀ-ն Նադեժդինին թույլ է տվել ստորագրություններ հավաքել դեկտեմբերի 28-ին։ Առաջին երեք շաբաթում նրա կողմնակիցներին հաջողվել է հավաքել 25 հազար ստորագրություն։ Այն բանից հետո, երբ Նադեժդինին իրենց աջակցությունն են հայտնել հայտնի ընդդիմադիր քաղաքական գործիչները, հավաքված ստորագրությունների թիվը սկսել է կտրուկ աճել, գոյացել են հերթեր, եւ հաջորդ 75 հազարը հավաքվել է ընդամենը հինգ օրում։ Հաջորդ 50 հազարի համար շտաբը ծախսել է ընդամենը երկու օր։

ՌԴ նախագահի մամուլի քարտուղար Դմիտրի Պեսկովը հունվարի 24-ին հայտնել է, որ Կրեմլում Նադեժդինին Վլադիմիր Պուտինի «մրցակից չեն դիտարկում»։