Հնդկական Bharat Petroleum Corp (BPCL) նավթավերամշակող ընկերությունը պատժամիջոցների պատճառով խուսափում է ռուսական պրեմիում Sokol հում նավթի գնումներից, գրում է Reuters-ը։

Sokol-ի համար BPCL վճարումները չեն կատարվում միջնորդ բանկերի միջոցով, հրատարակությանը պարզաբանել են ընկերությունից։ Ռուսական Urals-ի էժան նավթի գնումները շարունակվում են, սակայն շուկան ավելի է լարվել, հավելել է Reuters-ի աղբյուրը։

Խնդիրները սկսեցին ծագել այն բանից հետո, երբ ԱՄՆ-ն ուժեղացրեց վերահսկողությունը Ռուսաստանի դեմ պատժամիջոցների պահպանման նկատմամբ։ Բանն այն է, որ Sokol նավթը, իր ավելի որակյալ բաղադրության շնորհիվ, զգալիորեն գերազանցում է մեկ բարելի դիմաց 60 դոլար գնային առաստաղը։

Միևնույն ժամանակ, BPCL-ն ընդգծել է, որ չի նկատում ռուսական նավթի ստացման որևէ ընդհատում Կարմիր ծովում ճգնաժամի պատճառով և կշարունակի նավթ գնել ցանկացած աղբյուրից, եթե դա ֆինանսապես հնարավոր լինի։