Թուրքիան կարող է կորցնել ռուսաստանցի զբոսաշրջիկներից ստացվող շահույթը Ռուսաստանից կատարվող վճարային փոխանցումների խնդիրների պատճառով, երկուշաբթի գրել է Aydınlık թերթը։
«Եվս մեկ կարեւոր հատվածը տուրիզմն է։ Մոտենում է 2024թ. սեզոնը։ Բայց դրամական փոխանցումները չեն կարող իրականացվել։ Խնդիրներ են առաջանում անգամ տոնավաճառների կազմակերպման ժամանակ։ Կառավարությունը պետք է որքան հնարավոր է շուտ լուծում գտնի։ Այլապես կորուստները մեծ կլինեն»,- գրել է թերթի սյունակագիր Իսմեթ Օզչելիքը։
Հունվարի 1-ից թուրք արտահանողները բախվել են այն խնդրին, որ բանկերը հրաժարվում են ընդունել դրամական փոխանցումներ Ռուսաստանից։ «ՌԻԱ Նովոստի»-ի աղբյուրի խոսքով՝ խնդիրը մասամբ կապված է Թուրքիայի վրա ԱՄՆ ճնշման հետ՝ պատժամիջոցների առնչությամբ։ Հարցով զբաղվել է Թուրքիայի առեւտրի նախարարությունը, Մոսկվան երկխոսություն է վարում Անկարայի հետ։
Նրա գնահատմամբ՝ Ռուսաստան Թուրքիայի արտահանումը շարունակում է նվազել։ «Դա բացասաբար է անդրադառնում նաեւ Թուրքիայի արտահանման ընդհանուր ծավալի վրա... Արտահանողները փոխհատուցել են իրենց կորուստները Ռուսաստանում։ Եթե մենք կորցնենք ռուսական շուկան, մեր աշխատանքը կդժվարանա։ Սնանկացումներն անխւսափելի կլինեն։ Կառավարությունը պետք է որքան հնարավոր է արագ միջոցներ ձեռնարկի։ Նա պետք է անի հնարավոր ամեն բան։ Չպետք է տրվի ներքին «ամերիկանիստներին»,- նշել է փորձագետը։
Թուրքական կողմը պաշտոնական մակարդակով տեղեկացված է Ռուսաստանի հետ վճարային փոխանցումներում առկա խնդիրների մասին, իրավիճակն աղետալի չի համարում, երկու երկրների համապատասխան գերատեսչություններն աշխատում են իրավիճակի կարգավորման ուղղությամբ, «ՌԻԱ Նովոստի»-ին տեղեկացրել է աղբյուրը երկրի նախագահի աշխատակազմում։ Բանկային հատվածի աղբյուրը փետրվարի 14-ին տեղեկացրել էր, որ ԱՄՆ-ն, ելնելով պատժամիջոցների քաղաքականությունից, նախազգուշացնում է Թուրքիայի մի շարք մասնավոր բանկերի Ռուսաստանի հետ վճարային փոխանցումների մանրակրկիտ ստուգման անհրաժեշտության մասին, ինչը հասնում է սպառնալից տոնի։
